Print this page

Loron Mundial Traballadór, Asanami: Traballadór Timoroan Mak Asuwain

Prezidente Partidu Demokrátika (PD), Mariano ‘Asanami’ Sabino. Prezidente Partidu Demokrátika (PD), Mariano ‘Asanami’ Sabino. Foto Suplay

Tempotimor (Dili)-Prezidente Partidu Demokrátika (PD), Mariano ‘Asanami’ Sabino hatete, traballadór Timoroan sai asuwain, tanba luta traballadór timoroan sira mak kontribui dezenvolvimentu nasaun Timor-Leste ba oin.

Ho ida ne’e, Família PD fó parabéns ba traballadór mundu tomak ne’ebé selebra nia loron iha loron 01 fulan-maiu, tanba kontribuisaun traballadór mak muda mundu sai sivilizadu, modernizadu no mundu ne’ebé mak ho teknolojia ne’e obra traballadór sira-nian.

“Ba Timor-Leste, traballador hothotu ne’ebé iha rai laran no rai liur, Inglaterra no Irlanda, imi mak asuwain, imi- nia luta mak kontribui para Timor la’o ba oin. Imi-nia kontribuisaun ohin loron boot liu setór hothotu sai númeru daruak depois minarai”, deklara Asanami iha Sede Nasional PD, Kolmera, sábadu (01/05).

Tanba ne’e mak servisu saída de’it mak traballadór halo iha liur valór as tebes ba konstrusaun estadu, ba konstrusaun nasaun.

Maibé, tempu to’o ona atu iha rai laran hadi’a saláriu traballadór sira-nian. Traballadór sira iha ne’ebé de’it tenke sente katak servisu ho seguru hanesan ema no servisu la’ós hanesan atan.

“Ita- nia luta atu forma ema hothotu hanesan, ita-nia servisu la’ós sai fali fatór ida diskrinima ema. Ita-nia papel mak diferente, maibé importante mak hothotu ba ita-nia rai”, afirma nia.

Asanami mós lori família boot PD nia naran hato’o parabéns no prontu luta hamutuk ho traballaór, tanba iha situasaun agora, ema ne’ebé mai husi rai liu vensimenti di’ak no ema ne’ebé nu’udar rai na’in vensimentu kiik.

“Ita tenke munda situasaun ida ne’e, hamutuk ita muda situasaun ida ne’e, hamutuk ita dignifika malu, hamutuk ita dignifika nasaun”, dehan nia.(*)

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items