Tanba, reiuniaun Konsellu Ministru iha loron 29 fulan-abril aprova rezolusaun hodi impozisaun konfinamentu domisiliáriu jerál ba iha kapitál Dili.
Ho ida ne’e, populasaun tenke hela iha uma ka iha sira-nia alojamentu temporáriu, tuku 00:00 loron 30 fulan-abril tinan 2021 no tuku 23:59 loron 13 fulan-maiu tinan 2021.
Iha rezolusaun ne’e mós bandu atu transporte públiku sira hala’o movimentu iha área sira hotu iha Munisípiu Dili, liuliu, mikrolets, biskota, taksi sira no anguna sira.
Maibé iha loron 30 fulan-abril kuaze tuku 09:00 otl, motorista sira konsentra hamutuk iha palásiu governu oin hodi ezije governu atu labele hapara movimentu transporte públiku.
Motorista Angelino Soares hatete, sira-nia parte ezije,, tanba nesesidade mak obriga, la'ós lakohi kumpri regra serka sánitaria.
"Ami mai iha ne'e, tanba nesesidade mak obriga, ohin dadersan ami halo greve", dehan nia iha Palásiu Governu oin, sesta (30/04).
Iha situasaun ne'e, Polísia Nasionál Timor-Leste (PNTL) to'o kedan iha terenu hodi halo atuasaun.
Segundu Komadante PNTL Munisípiu Dili, Superientende Polísia, Euclides Belo hatete, governu deside ona, transporte públiku labele halo movimentu lai.
"Estadu deside, movimentu ba karreta hanesan Mikrolet,Taksi labele halo movimentu lai. Parabéns ba ita-boot sira, tanba bele rona, ita hotu rona, ami mós rona, ita-boot sira mós rona, ita mak Estadu nia ona, ita tenke rona", agradese nia.
Aviza mós ba motorista sira durante minutu 10 nia laran tenke hamamuk ona fatin iha Palásiu Governu oin hodi ba uma.
"Ita-boot sira fila ba ida-idak nia uma, labele halai Taksi, Mikrolet", alerta nia.
Nune'e, situasaun iha terenu parte motorista ho PNTL konkorda malu ona katak, liu tuku 12, karreta Taksi, Mikrolet séi la hala'o ona movimentu. (*)