Tempotimor (Dili)- Ministériu Obras Públika (MOP) identifika ona projetu reabilitasaun estruturál simples hamutuk 57 no komplexa hamutuk 44, tanba hetan estragu husi inundasaun.

Ministru Prezidensia Konsellu Ministru, Fidélis Magalhães hatete, levantamentu dadus ne’e foti hafoin inundasaun ne’ebé mosu iha loron 4 fulan-abril tinan 2021, tanba infraestrutura barak mak hetan estraga iha territóriu tomak.

Liuhusi Konsellu Ministru, loron 29 fulan-abril, Ministru Obras públikas, Salvador Soares dos Reis Pires, aprezenta dadus kona-ba identifikasaun ba infraestrutura no ba ekipamentu públiku koletivu ne’ebé hetan estragu husi inundasaun.

“Levantamentu dadus klasifikasaun husi obra hala’o hela maibé Informasaun preliminár sira indika ba projetu reabilitasaun estruturál simples 57 ne’ebé iha husi kustu inferiór dolar amerikanu millaun 1 no projetu reabilitasaun estruturál komplexa 44 ho kustu estimadu boot-liu dolar amerikanu millaun 1”, informa Fidélis iha Palásiu governu, kinta (29/04).

Iha aprezentasaun ne’e, relata mós kona-ba atividade limpeza, normalizasaun no iha projetu oioin ho karáter emerjénsia ne’ebé maka hala’o hela.

Aliende ne’e, Ministru Administrasaun Estatál, Miguel Pereira de Carvalho, iha kualidade Koordenadór ba Unidade Misaun ba Protesaun Sivíl no ba Jestaun ba Dezastra Naturál sira, halo aprezentasaun ida kona-ba pontu situasaun husi impaktu sira husi inundasaun iha loron 4 fulan-abril liubá no sira-nia asaun rekuperasaun.

Daudaun ne’e iha ema 4356 ne’ebé desloka ba sentru akollimentu hitu ne’ebé sei ativu. Iha nivel nasionál afeta ona husi inundasaun ba família ho totál 31, 337 no ema na’in-41 mak mate ka lakon.

Ho totál 21 178 abitasaun iha país tomak ne’ebé mak estraga. Ba infraestrutura públika, bee-sa’e provoka estragu iha estrada hamutuk 22 no ponte hamutuk 11.

Governu fó hela apoiu ba família afetada ho produtu alimetár no la’ós alimentár no halo hela planu atu distribui materia sira ba rekonstrusaun ba abitasaun sira ne’ebé mak estraga.

Analiza mós opsaun realojamentu ba populasaun ne’ebé mak hela iha área proibidas ne’ebé bele hetan iha área inundasaun no área foho lolon sira ho perigozidade média to’o aas.

Ikusliu, Vise Primeiru Ministru no Ministru Planu no Ordenamentu, José Maria dos Reis, aprezenta konjuntu medida sira ordenamentu teritóriu ba prevensaun no mitigasaun ba risku sira. Hala’o ona levantamentu dadus kona-ba área risku ne’ebé lokaliza iha zona inundasaun no área foho lolon sira ho perigozidade média to’o aas.

Iha ne’e, José Reis, aprezenta mós nesesidade intervensaun lejislativa iha ámbitu ordenamentu teritóriu, opsaun ba realojamentu temporáriu no definitivu ba populasaun sira no posibilidade fatin ba realojamentu. (*)