Tempotimor (Dili) - Prezidente Parlamentu Nasional, (PN), Aniceto Longuinhos Guterres Lopes, husu ba Timoroan hotu atubele proteze-an husi surtu Covid-19.
Tanba, pandemia covid kontinua sai preokupasaun no dezafiu ba nasaun hotu iha mundu inklui mós Timor-Leste ne’ebé resjita kazu kada loron aumenta.
“Timor-Leste nia situasaun pandemia covid-19 kadavez pior liuliu iha fulan ikus, pelo isso tama ona ba transmisaun komunitáriu e parese ita iha ona dalan pior senáriu”, dehan Aniceto bainhira abertura ba sesaun plenária iha Parlamentu Nasional (PN) Dili, kuarta (28/04).
Governu ne’ebé husu tan renovasaun estadu emerjénsia ba dala-XIII, presiza iha plenária hodi haree situasaun real pandemia covid-19 nian no oinsá estadu tomak tau esforsu hodi hasoru dezafiu ne’e.
"Mai ita hotu kumpri ita-nia dever atu fó protesaun máximu ba ema Timor no proteje saúde públiku”, afirma Aniceto.
Entertantu rezultadu reuniaun Konsellu Estadu (KE) no Konsellu Superior Defeza no Seguransa (KSDS) líder husi Prezidente Repúblika haruka ona pedidu governu nian relasiona ho EE ba dala-XIII ba Parlamentu Nasional (PN) atu aseita antes PR dekreta.(*)