Tuir planu, aban, loron kuarta (28/04) formasaun sei hala’o iha edifísiu SEKoop Akait, Aldeia Formoza, Suku Gricenfor, Postu Administrativu Cristo Rei, Munisípiu Dili.
Bazei ba informasaun ne’ebé www.tempotimor.com asesu katak, formasaun ne'e organiza husi Diresaun Nasionál Kooperativa Produsaun Integradu (DNKPI), atu kontinua fó formasaun bázika kona-ba lala'ok kooperativa nian ba juventude sira hamutuk ema na’in-21 ne'ebé mak durante ne'e envolve-an iha indústria ki'ik sira.
"Joven hirak ne'e, durante hala'o atividade iha área indústrial ki'ik, hanesan halo kripik, nomós atividade sira seluk tan, hodi fó formasaun bázika ne'e atu transforma sai kooperativa indústrial”, informa mídia SEKoop liuhusi ajenda ba mídia sira, tersa (27/04).
Enkuantu formasaun ne'e rasik sei hala'o durante semana ida nian laran, no iha formasaun ne'e mós formandu sira kontinua obedese ba regra husi Organizasaun Saúde Mundiál (OSM) nian, distánsia sosiál, uza máskra, no fase liman.(*)