Xefe Gabinete Ministériu Interior, Francisco Maia hatete, apoiu emerjénsia sira ne’e mai husi Guvernu, ajensia internasional sira nomós setór privadu balu.
“Ohin Guvernu transporta tan apoiu emerjénsia ne’ebé entrega direta ona ba ofisiál Administradór Postu Administrativu Laclubar. Apoiu hirak ne’e maka fós, biti, manta, latarias, bolachas no ita halo ona ba pakote kompostu hosi “food no non-food” mai husi Ministériu Solidariedade Sosial, Ministériu Interior, ajensia internasional sira ne’ebé lidera husi Sekretáriu Estadu Protesaun Sivil”, dehan nia lihusi komunikadu ne'ebé www.tempotimor.com asesu, segunda (26/04).
Diretór Nasional Jestaun Risku Disastre (DNJRD), Agostinho Cosme Belo informa, apoiu emerjénsia ba Suku 6 iha Laclubar ne’e mai husi Guvernu Timor-Leste rasik nomós parseria dezenvolvimentu sira.
“Husi SEPS rasik apoiu mak Latarias Sardina kaixa 50, biti karon 12, family kit karon 91, biskuit masin kaixa 10 husi Peace Wing, manta karon 10 husi JICA, family kits pakote 300 husi PARCIC ne’ebe tula ho kareta hodi kompleta sasan ne’ebe tula ho helikopeteru”, hatete nia.
Xefe Suku Orlalan, Carlos de Alves, hato’o nia sentimentu haksolok ba Guvernu tanba ho apoiu emerjénsia ne’e bele hamenus ona populasaun sira nia sofrimentu.
"Partikularmente iha Suku Orlalan, tuir dadus ne’ebé ami rekolla, estragu ba uma de’it hamutuk 146 seidauk konta ho Suku seluk. Tanba ne’e, ha’u lori komunidade nia naran hakarak hato’o agradese wain ba Guvernu tanba material sira ne’e bele hamenus komunidade nia susar”, dehan Xefe Suku ne'e, ba iha Laclubar, domingu (25/04).
Tuir dadus, totál vítima uma-kain ba dezastre naturál iha Postu Administrativu Laclubar, iha Suku 6 haneaan Suku Orlalan hamutuk uma kain 111, Batara 126, Funar 95, Fatumakerek 36, Manelima 22 no Suku Sananain uma-kain 1.(*).