PN Aprova Orsamentu Rektifikativu Iha Final Globál, Bankada CNRT Abstein

Tempotimor (Dili)-Parlamentu Nasionál (PN), iha sesta (23/4) aprova ona proposta Orsamentu Rektifikativu (OR) liuhusi alterasaun Lei Orsamentu Jerál Estadu (OJE) 2021 iha finál globál ho rezultadu votus afavór 44,  Bankada CNRTdeputadu nain 20 fó votu abstensaun no votu ida dezaparese.

Hafoin finaliza kontajen ba votu, Prezidente Parlamentu Nasioná, Aniceto Guteres, husu governu atu implementa medida politika tuir rekomendasaun PN nian.

“Ho nune’e orsamentu rektifikativu aprovadu. Husu Governu implementa medida polítika ne’ebé aprova hamutuk iha orsamentu ida-ne’e no kumpre rekomendasaun husi deputadu sira”, deklara Aniceto iha plenária PN, sesta (23/04).

Deputada Bankada CNRT, Virgínia Ana Belo hatete, pozisaun Bankada CNRT ba aprovasaun Finál Global Proposta Orsamentu Rektifikativu 2021 ne’e hodi fó votu abstensaun.

“Ohin Bankada CNRT la fó votu afavór maibé fó votu abstensaun tanba razaun orsamentu rektifikativu ne’ebé aprezenta iha trimestre dahuluk ba ano fiskál 2021 ne’e justifika loloos pozisaun Bankada CNRT ne’ebé halo walkout ba OJE 2021”, dehan nia.

Tanba OJE 2021 la tuir estrutura, la reflete ba realidade, la tau osan ba COVID-19, no la-prevee osan ba kalamidade mezmu iha Marsu 2020 mosu ona dezastre Naturál hanesan alerta ida ba Governu no ba entidade sira hotu.

Aleinde Deputada Bankada Partidu Libertasaun Populár (PLP), Maria Angelina Lopes Sarmento, louva Governu daualu ne’ebé lori proposta orsamentu retifikativu atubele fó resposta imediata ba evolusaun surtu COVID-19 no kalamidade inundasaun ne’ebé povu Timor-Leste enfrenta iha loron 4 fulan-abríl.

Ho ida ne'e, Bankada PLP espera Governu uza orsamentu ne’ebé aumenta iha rezerva kontinjénsia responde kestaun emerjénsia sira-ne’ebé mak Governu presiza duni rekursu sufisiente atubele resposta imediata ba povu ida-ne’e.

“Hanoin importante liu mak osan ida-ne’e tuir prinsípiu VIII Governu Konstitusionál nian atu kontinua promove boa governasaun, transparénsia no orsamentu ida-ne’e ami fó fiar atu ezekuta bazea ba planu no nesesidade sira-ne’ebé mak ita-nia nasaun ne’e hasoru hela. Ami dezeja susesu,” refere deklarasaun polítika hosi Bankada PLP.

Enkuantu Orsamentu Rektifikativu ne’e altera OJE 2021 ho montante billaun US$1,895 hodi prevee ba kombate surtu COVID-19 no problema cheias (dezastre naturál) no inundasaun.

Iha proposta Governu propoin tokon US$223,8 prevee ba fundu COVID-19 ne’ebé aumenta tán ba orsamentu orijinál, no integrasaun saldu jerénsia ne’ebé la inskritu iha OJE 2021 ho montante tokon US$135,3.

Nune’e mós altera OJE 2021 ne’e foti hosi fundu infraestrutura tokon US$54 no ministériu sira hamutuk tokon US$65,152 nune’e rezerva kontinjénsia sa’e ona tokon US$100-resin hodi fó resposta ba problema cheias no inundasaun ne’ebé akontese iha loron 4 fulan-abríl liubá. Hosi ajustamentu hirak ne’e inklui saldu jerénsia tokon US$135,3 ne’e OJE 2021 sa’e ba billaun US$2.1

Nune'e tuir planu, diploma kona-ba lei ne’e sei submete ba Prezidente Repúblika iha segunda (26/04).(*)

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com
Darwin_Optic

.

Contact us

Palapasu
Dili, Timor-Leste
+670 7723 4852
+670 7728 1698
http://www.tempotimor.com

Kalendariu Arkivu

« August 2021 »
Mon Tue Wed Thu Fri Sat Sun
            1
2 3 4 5 6 7 8
9 10 11 12 13 14 15
16 17 18 19 20 21 22
23 24 25 26 27 28 29
30 31          

Tempo Timor Networks

Online Counter