Tempotimor (Dili) - Governu liuhusi Ministru Admistrasaun Estatal (MAE), Miguel Perreira hatete, governu sei halo rezolusaun atu bandu no muda populasaun ne'ebé hela iha área risku sira.
"Governu mós hasai rezolusaun governu ida ne’ebé bandu ema para ba hela fali iha fatin ne'ebé área risku, tanba sasán ne'e hotu governu nia planu husu ona ba xefe suku no aldeia sira para ba rejista ita-nia populasaun sira ne'e”, dehan Miguel iha Parlamentu Nasional Dili, sesta (23/04).
Dadaun ne'e iha Suku Komoro liuhusi Xefe suku ho Xefe Aldeia 12 Outubru hahú rejista ona populasaun sira ne'ebé mak tama iha grupu área risku.
"Ho lideransa ministru planu e ordenamentu nian, sira identifika ona pelumenus iha fatin ne'en (6) ke ita bele utiliza, área fatin sira ne'e ladook demais husi areador Dili, ne'ebé planu lolos oinsá atu trata ema sira ne'ebé mak labele filafali ba sira-nia hela fatin ne'e tuir mai governu sei informa”, dehan Miguel.
Ho orsamentu rektifikativu ne'ebé reforsa osan iha fundu kontizensia no infraestrutura atu fó solusaun ba problema hirak ne'e inklui apoiu umanitária.
Dadaun ne'e MAE rasik sei rejista populasaun ne'ebé sei hetan benefísiu husi planu governu no aloka ona ba hela fatin provizóriu hanesan eskola sira.
Governu planu fó solusaun ba vítima sira ne'ebé mak uma sira estragu, governu fasilita fó apoiu matérial konstrusaun ho finanseira balun ba sira atubele hadi’a fali uma.
Tuir dadus totál populasaun ne'ebé afeitadu iha Dili hamutuk rihun 25.
Antes ne'e mós Xefe estadu maior jeneral Falintil-FDTL, Tenente Jeneral Lere Anan Timur, husu atu governu bandu komunidade sira hela iha fatin risku hanesan foho lolon no mota-ninin.(*)
