Tanba durante mosu inundasaun, mota sobu totál ona sira-nia uma, nune'e sei hein apoiu rekuperasaun husi governu molok fila.

Durante mosu inundasaun, família uma-kain hamutuk 72 mak evakua ba semináriu Sacrojes ho kuantidade populasaun hamutuk 585, no sira ne’ebé fila ona, ho xefe família hamutuk 32.

"Maibé sei hela tan 40 resin, quer dizer 300 ital pesoál sei hela hamutuk ho ami, hein to'o bainhira governu iha inisiativa atubele toma desizaun tulun sira iha situasaun ida ne'e, sira-nia probreza ida ne'e”, informa Padre Nivio iha Suku Hera, sesta (23/04).

Entre vítima afetadu sira ne'e, husi bairru Kampung Baru nian mak jerálmente sira hahú husi zero fali, tanba halai salva-an ho roupa iha isin-lolon de'it.

"Sira ne'ebé hela iha ne'e, nú-entantu hodi hein planu governu nian, sira ne'ebé uma laiha. Kerdijer ke sira halai husi dia 04 ne'e to'o agora halai ho roupa tanan de'it, la hodi ho roupa tanan ida, sira la hodi buat ida. Ne'ebé ita atu haruka sira fila, sira atu ba ne'ebé", tenik nia.

Diretór Jerál iha Sekretária Estadu Protesaun Sivil (SEPS), Ismael da Costa Babo esplika, apoiu rekuperasaun iha tipu tolu, aat, aat natoon, aat totál ka estraga hotu husi dezastre naturál.

"Ida ne'e mak dadus ne'e importante tebes ba inan aman sira fó loloos ba ekipa sira. Atu nune'e sira ne'ebé mak iha direitu atu hetan, no sira ne'ebé laiha direitu husu ho konsiénsia", nia hakotu.

Maibé, faze dahuluk husi intervensaun governu nian mak fó apoiu emerjénsia ba vitima sira hanesan, hahán no la'os hahan (food and non-food).

Vitima ne'ebé nia uma hetan sobu totál husi korente mota nian, Josefa da Cruz hatete, sira-nia kondisaun uma grave.

“Ami hela iha kongregasaun Canossiana nia fatin. Ne'e signifika katak, ami-nia fatin, ami-nia uma grave tebtebes mak ami mai iha ne'e”, dehan nia ho triste.

Husu ba governu atu tau matan ba sira nia moris, no husu atu hadi'a mós barrajen, bainhira akontese udan mota tun, bele halai tuir nia dalan.

Entretantu, totál uma-kain ne'ebé evakua ba kongregasaun Canossiana iha SACROJES Hera, hamutuk 72, maibé umakain 32 fila ona, sei falta 40.(*)