Prosesu reintegrasaun ne'e, liuhusi diálogu ida ne’ebé hala’o husi Sekretária Estadu Protesaun Sivil (SEPS) liuhusi Diresaun Nasional Prevensaun Konflitu Komunitáriu (DNPKK) ho Diresaun Nasional Risku Dezastre Naturál (DNRDN) ho Plan International iha salaun seminarista SACROJES iha aldeia Ai-lok Laran, Suku Hera, Postu Administrativu Cristo Rei, Munisípiu Dili.
Diretór nasional Sekretáriu Estadu Protesaun Sivil (SEPS), Superintendente Polísia, Ismael da Costa Babo esplika, diálogu ne’e fó hanoin ba família afetadu sira ne'ebé uma ladun hetan estragu bele fila.
Tuir informasaun ne’ebé simu iha uma-kain 70 resin, maibé uma-kain 47, liuhusi diálogu bele esplika ba sira atu fila ba sira-nia uma.
“Ita esplika, kondisaun real ne'ebé akontese durante Dezastre naturál nomós mos husu ba sira para bele reintegra para sira filafali ba hela iha sira-nia fatin", dehan Ismael iha Hera, sesta (23/04).
Iha prosesu reintegrasaun ba vítima sira nee, diresaun nasional jestaun risku dezastre liuhusi protesaun sivil ninian, fasilita apoiu emerjénsia hahán balu nomós nesesidade dapur nian balu ba sira.
"Ba sira ne'ebé estragus uma total iha ne'e, ita-nia amu sira sei akumula hela iha ne'e, ita-nia ekipa sei tun halo vetifikasaun ba estragu sira ne'e, depois sei apoiu rekuperasaun ba sira iha tempu ne'ebé mak tuir mai”, dehan nia.
Koordenadór jerál iha simináriu Sacrojes Hera, Padre Nivio Correia Lebre informa, hahú husi prosesu evakuasaun to'o iha inundasaun nian, sira akomoda Xefe família hamutuk 72, ho totál membru família hamutuk 585, ne'ebé mai husi bairru Kampung Baru ho Bedik.
Maibé, sei hela Uma-kain 40 mak sei seidauk bele fila ba idaidak nia uma hela fatin, tanba kondisaun uma gráve no estragu totál husi korente mota.
"Sira la sai hotu. Sira ne'ebé sai ohin ne'e, sira ne'ebé iha uma. Sira-nia hahú hamoos ona, prepara kondisaun di'ak ona, sira hahú fila", dehan nia.
Vítima afetadu inundasaun, Casilda Guterres haktuir, sente kontente bele fila ba uma, maibé nia parte triste oituan tanba, durante mosu bee-sa'e uma, sasán uma-laran barak mak la salva, tanba bokon hotu, maibé ho esforsu ne'ebé sira iha, konsege halo limpeza hotu ona.
"Ami mós kontente ho apoiu ruma husi governu hanesan fós, roupa balu hodi ami bele uza", dehan nia.(*)