Ho alterasaun ne'e, Ministru Finansa, Rui Augusto Gomes, agradese ba proponente sira ne'ebé inisia proposta atu koa orsamentu husi BNCTL.
Tanba iha faze aplikasaun Serka Sanitária la permite atividade ekonómika la’o normál, entaun governu aseita bele koa.
“La’ós dehan atu kansela maibé espera katak iha Orsamentu Jerál Estadu (OJE) 2022 ita bele kontempla filafali atu nune’e investimentu sira bele la’o ho normál bainhira ita rezolve ona kestaun COVID-19”, hatete nia iha plenária PN, kinta (22/04).
Entretantu iha proposta ne’e husu retira millaun US$15 husi títulu dotasaun Governu tomak, iha kategoria despeza transferénsia públika no tau fali ba dotasaun Governu nian parte bens no servisu, nune’e reforsa fundu kontinjénsia hodi resposta ba dezastre naturál ne’ebé akontese iha loron 04 fulan-abríl 2021 liubá.
Proposta númeru 32 ho rezultadu votasaun a-favór 41, kontra 2 no abstensaun 18. Aleinde Proponente hirak ne'ebe aprezenta proposta ne’e mak Deputadu Bankada FRETILIN, Francisco Miranda Branco no Deputadu Joaquim dos Santos.
Maibé, Deputadu Bankada Fretilin, Maria Angélica Rangel, la konkorda atu hasai tan osan husi BNCTL tanba governu deside atu rekonstrusaun ba infraestrutura ne'ebé estragu kauza inundasaun, emprezáriu Timoroan sira presiza asesu kreditu husi BNCTL.
"Ha’u lakonkorda atu koa maibé tanba desizaun politika ha’u hanesan bankada governu ha’u submete ba desizaun governu nian, governu hakarak koa, depois mak ami tuir ba fiskaliza”, dehan Angélica Rangel iha PN Dili, kinta (22/04).
Nune’e, deputadu Antoninho Bianco husi Bankada Fretilin, reforsa uluk BNCTL hanesan makro kreditu iha primeiru governu hafoin transforma, tanba ne'e tenke reforsa.
"Mesmu ha’u la konkorda maibé situasaun obriga ha’u konkorda maibé buat ne'ebé governu promete tenke halo tuir”, dehan Bianco.(*)