Tempotimor (Dili) - Formadór sira hamutuk na'in-47 iha Sekretária Estadu Kooperativa (SEKoop) hetan ona rekoñesimentu husi Instituto Nacional Dezenvolvimento Măo de Obra (INDMO) hodi halo atribuisaun sertifikadu iha nivel formadór nasionál.
Legalizasaun no rekuñesimentu ne'e fó, liuhusi avaliasaun ne'ebé halo husi ekipa avaliadór sira INDMO nian iha fulan-janeiru, ba funsionáriu sira iha SEKoop laran.
Sekretáriu Estadu Kooperativa (SEKoop), Elizário Ferreira hatete, formasaun ba formadór sira hamutuk na'in-84 ne'ebé prepara ona atubele hala'o formasaun ba nivel baze.
Maibé, bazeia ba avaliasaun husi INDMO nian, rezultadu hatudu, iha na'in-47 mak sertifika ona sai nivel formadór nasional nian.
"Dadaun ne'e, formadór hamutuk 47 mak legalizadu ka rekuñese husi parte INDMO ninian, ne'ebé akomodadu iha federasaun hanai malu ho SEKoop rasik", dehan Elizário iha Akait, tersa (20/04).
Durante ne'e, formasaun iha trimestre dahuluk nian, SEKoop hala'o ona ba funsionáriu sira hamutuk na’in-1226 iha territóriu TL.
Tanba ne'e, ekipa sira kontinua halo preparasaun ba modulu oinsá formasaun bele la'o nafatin.
Diretór Nasionál Dezenvolvimentu Kooperativa, Reinaldo Borges antes ne’e informa, formadór sira mós presiza haforsa kuñesimentu iha formasaun kona-ba jestaun kooperativa naun finanseira nian, hodi nune'e bele hamoris liután setór naun finanseira ba movimentu kooperativa sira hotu iha TL.(*)