Konferensia AMP ho tema "Konsolida AMP hodi Serbi Di'ak Liu Povu" ne'ebé sei realiza durante loron rua nia laran, Sabadu (15/06) to'o Domingu (16/06), ne'e ho objetivu atu halo avaliasaun ba serbisu governu nian.
Iha loron dahuluk konferensia AMP ne'ebé taka ba publiku ne'e la hetan prezensa husi Prezidente AMP, Xanana Gusmão.
Ba ida ne'e, Prezidente Bankada CNRT Duarte Nunes hatete, Xanana Gusmão iha koñesimentu ba Konferensia AMP ne'e maibé nia la marka prezensa tanba iha atividade seluk.
"Maun boot (Xanana) hanesan Prezidente AMP, nia hatene (Konferensia ne'e), (maibé) tanba nia iha atividade seluk ne'ebé la permite nia mai. Nia hatene tanba Sekretariu Jeral (Kalbuadi) nu'udar Koordenador Jeral Konsellu Diretiva AMP update hela situasaun ba nia ne'ebé nia hatene," dehan Duarte iha fatin konferensia, Sabadu (15/06).
Hatan kona-ba asuntu ne'ebé diskuti iha Konferensia AMP ne'e, Duarte dehan iha asuntu barak, maibé importante mak halo avaliasaun ba serbisu governu nian.
"Buat barak, mós sei halo avaliasaun, i avaliasaun ne'e mak importante, i rezultadu orsida ita-boot sira (jornalista) sei haree iha konferensia imprensa," dehan Duarte.
Maske Konferensia ne'e taka ba publiku maibé distkursu Primeiru Ministru Taur Matan Ruak iha Konferensia refere hahu suar sai husi terra santa.
Iha diskursu refere, PM Taur la koalia sai ho klaru problema hirak ne'ebé mosu iha governu nia laran, maibé PM ho diplomatikamente rekoñese dezafiu no impaktu, no mós buka dalan atu solusiona.