Timor Leste ne’ebé “Espesial” ba Amerika Featured

Eis Prezidente da Republika, Dr. Jose Ramos Horta Eis Prezidente da Republika, Dr. Jose Ramos Horta Foto suplai

Tempotimor (Dili) - Hafoin Timor Leste hetan ninia independensia, Estadus Unidus Amerika foti desizaun hodi ‘oferese’ sira-nia moeda, dollar Amerika ($), atu Timor Leste bele uza. Aleinde moeda ne’e, Amerika mós fó apoiu lubuk ida ba Timor Leste.

Ba apoiu hirak ne’ebé Amerika oferese ona, eis Prezidente Repúblika José Ramos Horta hatete Timor Leste tenke konsidera relasaun ho Amerika nu’udar relasaun importante ida, tanba dezde uluk kedas to’o agora relasaun entre Prezidente Amerika hotu-hotu ho Timor Leste di’ak tebes.

Prova ida, tuir Horta mak ajuda husi Amerika ba Timor Leste ne’ebé seidauk hatuun maske sira-nia ajudus ba nasaun sira seluk hatuun ona.

“Sira (Amerika) koa ajuda ba rai barbarak maibé ba Timor sira mantein”, dehan Horta.

Tuir informasaun ne’ebé Horta rona, Amerika hakarak atu hadia Aeroportu Baukau sai aeroportu multiuzu.

“Dala-ruma sira (Amerika) mós bele uza kuandu iha problema ruma, tsunami ka dezastre ruma iha, sira bele uza,” esplika Horta.

Tuir mai deklarasaun kompletu José Ramos Horta (JRH) ba jornalista Tempo Timor (JTT) foin lalais.

JTT: Señor Dr. Horta, oinsa ita-boot nia haree ba relasaun entre Timor Leste ho Amerika?

JRH : Ita-nia relasaun ho Amerika tenke ser prioridade ida. Uluk kedas tempu Bill Klinton, nia mai iha ne’e, ba ita-nia independensia, nia eis prezidente mak haruka nia mai. Relasaun Prezidente (Amerika) hotu-hotu di’ak. To’o agora Estadu Unidus seidauk hatuun ajuda ba Timor, sira ko’a ajuda ba rai barbarak maibé ba Timor sira mantein. Iha ita-nia rai grupu kiik-oan ida, iha enjeñaria militar ninian, grupu peace corp, serbisu voluntariu iha ne’e ho kualiadde di’ak, hatudu sira-nia domin ba povu Timor, joven sira no laiha mudansa.

Foin dadaun ha’u lee informasun ke Estadus Unidus hakarak hadia aeroportu Baukau par multiuzu, dala-ruma sira mós bele uza kuandu iha problema ruma, tsunami ka dezastre ruma iha, sira bele uza.

Entaun ita-nia relasaun ho Amerika importante, pur-ezemplu ha’u haree embaixada (Amerika) iha ne’e ativa tebtebes, nia ema ida ne’ebé ke di’ak dezde ke nia mai. Ha’u haree embaixada ne’e badinas tebtebes, kreatividade oioin.

Entaun, ita mós tenke halo esforsu par fó resposta ba Estadus Unidus, pur-ezemplu kona-ba rai embaixada nian ne’e, Amerika hakarak tinan 100, 200, Timor la fó resposta loloos. Estadus Unidus hakarak rai ne’e garantia ba tinan 200 tanba sira haree ke Timor Leste importante tebtebes, entaun sira hakarak aluga kedas iha ne’e tinan 200.

Tanba iha mundu balun sira nune’e, maibé ba ita laiha solusaun, lei la permite, mais se mak halo lei ne’e, ita mak halo lei, se lei la permite entaun ita muda lei par permita, hodi governu dehan se imi hakarak tinan 200 entaun di’ak.

Buat sira ne’e sai iha media tiha ona, entaun ha’u ko’alia. Entaun iha rivalidade Amerika ho Xina ne’e iha, hanesan rivalidade Amerika ho Xina ka ita bele hateten rivalidade entre Amerika ho Europa. Uluk sira aliansa, agora rivalidade iha, ka relasaun laduan di’ak ho rai barak iha Europa, maibé ita buka nafatin relasaun di’ak ho hotu-hotu.

Xina rai boot mundial no rai boot Asia, Timor nia relasaun ho Xina la’os foin hahú tempu luta sira apoiu ita depois sidaun Xina, liuliu ema haká mai iha Timor, tempu portugues, dezde uluk kedas Xina mai tiha ona iha ne’e, tinan 200, 300, 400 liu ba sira mai tiha ona iha ne’e halo komersiu, Timor-oan, ema Xina mas étniku tanba moris iha ne’e iha viz-avó kedas sira iha ne’e hanesan Sr. Zakonshu, entaun ita haree iha abut, iha relasaun ho Xina. Ita hakarak mak ne’e relasaun di’ak ho Xina, relasaun di’ak ho Amerika, ita la sai hanesan hamutuk ho rai boot ida, ho sai inimigu ho rai boot seluk. Hanesan rai kiik, ita sei buka relasaun di’ak ho rai boot rua ne’e.

 

Rate this item
(3 votes)
Last modified on Friday, 14 June 2019 23:56
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Contact us

Palapasu
Dili, Timor-Leste
+670 7723 4852
+670 7728 1698
http://www.tempotimor.com