Ministra Negósiu Estranjeiru Nova Zelándia, Nanaia Mahuta hatete, sira iha komprimisu atu hamutuk ho TL hodi hatán ba problema inundasaun ne'ebé mosu.

"Nova Zelándia sei oferese suporta ho montante milliaun 1.4 USD ba TL depois bee-sa’e maka’as no aumenta iha kazu covid-19 foin lalais ne'e", dehan Ministra Negósiu Estranjeiru, Nanaia Mahuta liuhusi komunikadu e imprensa ne’ebé www.tempotimor.com asesu, tersa (20/04).

Apoiu hirak ne'e inklui mós fornesimentu asisténsia humanitáriu no Ekipamentu Protesaun Pesoal (PPE) tula hotu husi aviaun Royal Force Aero Nova Zelandia nian.

"Ami-nia hanoin hamutuk ho povu TL ne'ebé hetan impaktu husi bee-sa'e maka'as no rai-halai, iha momentu ne'ebé nasaun ne'e mós jere covid-19 foin lalais ne'e", dehan nia.

Sasán ajudu sira ne’e hanesan ijiene família nian, sasán ba inan no labarik ki'ik nian, ai-moruk ba halo mós bee, bomba bee no lampada solares.

Nune'e mós, UNICEF sei servisu hamutuk ho governu TL atu distribui ekipamentu ajudu sira ne'e, ba sira ne'ebé mak presiza liu.

Ekipamentu protesaun pesoál hirak ne'e, inklui protetores oin nian, luvas, máskra, oklu protesaun, matéria ba swab no ropa médiku nian no sei distribui husi SAMES.

Nova Zelándia fó kontribuisaun ba programa aihan mundial hodi suporta transporte no distribui sasán sokoru ba vítima inundasaun sira iha Dili no distritu sira ne'ebé mak hetan impaktu.

Governu Nova Zelandia mós sei servisu hamutuk ho organizasaun Naun Hovernamental (ONG) sira hodi responde ba problema inundasaun inklui responde imediata ba umanitáriu no atividade sira rekuperasaun termu médiu.(*)