Tuir Xefi Saúde militár husi Falintil FDTL ne'e katak, covid-19 hanesan funu boot ida, la'os mosu iha timor de'it, maibé funu iha mundu tomak.

"Tanba ida ne'e mak saida mak Timor bele halo. Sé ita hanoin katak ne'e funu, ema hothotu tenke esforsu para kontra funu ne'e, mak ida ne'ebé, simu vasina ne'e meius ida ne'ebé atu proteze ita-nia aan husi funu nia inimigu ne'e”, dehan Guido durante akompaña membru Falintil FDTL sira simu vasina AstraZeneca iha kuartel jenerál Fatuhada, segunda (19/04).

Maibé meiu seluk ne'ebé uza hodi proteze-an husi covid-19, ida mak tenke halo distansiamentu sosial, uza máskra, no fase liman bebeik.

"Ida ne'e mak sai pontu prinsipál ba ema ida- idak hodi bele elimina covid-19 iha Timor-Leste”, afirma nia.

Vasina ne'e hahú abertura iha kuartel jenerál, maibé fó prioridade uluk ba sira ne'ebé servisu iha liña oin (front line), tanba iha membru balu atu ba troka fali sira seluk iha postu seguransa iha fronteira.

"Ba komponente CT rasik, nia hahú ona iha semana uluk liu ba tanba atu halo substituisaun iha fronteira, tanba ida ne'e mak ekipa atu na troka sira iha fronteira ne'e, la'o dadauk ih semana passada”, haktenik nia.

Atividade vasinasaun ne'e hala’o tanba servisu hamutuk entre Saúde militár F-FDTL nian ho ministériu saúde hodi fó vasina ba membru sira hotu, maibé la'os obrigatóriu.

"Năo, ne'e la'os obrigatóriu, ne'e voluntáriu. Voluntáriu, maibé ita-boot (jornalista) sira haree forsa armadas antuziazmu, atu simu vasina AstraZeneca ne'e. Tanba sira hatene katak ne'e inimigu boot ida ne'ebé atu mai invade ita. Entaun, saida mak ita bele halo, buka forma atubele elimina no invade inimigu invizivel ne'ebé atu mai estraga ita”, dehan nia.

Tuir oráriu, unidade komponente navál, komponente terreste, komponente apoiu servisu, no membru husi komponente CT nian balu sei hahú iha tersa (20/04).(*)