Maske loron segunda (19/04) deputadu sira husi bankada FRETILIN, PLP, PD, KHUNTO, UDT, deside tuir vasina, maibé bankada CNRT seidauk bele tuir.

Tanba ne'e, Deputada CNRT, Vergina Ana Belo li husi deklarasaun polítika hakarak hato’o ninia opiniaun no hanoin balun kona-ba vasina AstraZeneca ne’ebé Governu hahú aplika ona ba sidadaun balun.

Bankada CNRT buka no hatene benefísiu no risku husi vasina AstraZeneca ne’ebé ikus mai hetan informasaun katak nasaun barak mak suspende ona vasina refere.

Razaun prinsipál ne’ebé dudu nasaun sira ne’e suspende vasina AstraZeneca ne'e tanba bazeia ba Regulador Europeia no Inglaterra konfirma katak iha posibilidade ligasaun entre vasina AstraZeneca ho koágulu ran ka hamosu ran kafuak iha isin lolon.

Ho ida ne'e, iha loron 4 fulan-abríl 2021, Ajénsia Europeia ba Medikamentu simu mos relatóriu kona-ba kazu koágulu ka ran kafuak hamutuk 169, no kazu ne’e maioria akontese ba feto ho idade menus husi tinan 60.

"Nasaun Europeia barak mak suspende aplikasaun vasina AstraZeneca ba de’it ema ne’ebé nia idade liu ona 55 ka 60. Iha Inglaterra rasik, Governu rekomenda atu labele uza vasina AstraZeneca ba sidadaun sira ho otas ka tinan 30 mai kraik”, hatete nia iha PN, segunda (19/04).

Iha Nasaun viziñu, Australia rasik iha loron 8 Abríl 2021 rekomenda ba sidadaun sira ne’ebé iha tinan 50 mai kraik atu uza vasina Pfizer’s husi Estadu Unidus Amérika, la’ós uza vasina AstraZeneca.

Enkuantu Nasaun sira hanesan; Australia, Inglaterra, Canada, Estonia, Fransa, Finlándia, Jeórjia, Alemaña, Irlanda, Italia, Olanda, Korea Sul, no España, suspende uza vasina AstraZeneca ba nia sidadaun sira ne’ebé ho otas 50 mai kraik.

Maibé, nasaun sira ne’ebé hapara totál atu uza vasina AstraZeneca mak hanesan; Kamorun, Dinamarka, no Norvejia.

Tanba ne’e, Bankada CNRT konsidera faktu sira ne’e hatudu vasina AstraZeneca la’ós 100 porsentu seguru atu aplika, inklui ba Timor-Leste ne’ebé nia sidadaun maioria joven.

"Tuir dadus husi sensu population 2015 hatudu katak, husi totál populasaun 1.2 millaun, sidadaun ne’ebé ho idade 60 ba leten iha de’it na’in 96,942, karik oras ne’e ita bele dehan por-volta 120,000”, hatete nia

Bankada CNRT preokupa liután bainhira Organizasaun Mundial ba Saúde (OMS) deklara atu nasaun ida bele hetan imunidade hasoru Covid-19 mak kada nasaun tenke aplika vasina ba porsentu 70 husi nia sidadaun tomak.

Entretantu hahuú dader to'o tuku 12:00 otl, deputadu 21 husi bankada CNRT seidauk iha ida mak atu hakat ba tuir vasina.(*)