Mídia imprimi ne'ebé dadaun ne'e asina kontratu no hetan autorizasaun ho MAPkomS hodi publika publisidade no informasaun kona ba moras covid-19 mak mídia TimorPost, Independen no STL.

“Ita hothotu hakarak luta hodi halo prevensaun ba covid-19, tanba ne'e mak Ministériu mós iha preokupasaun ba ida ne'e no hakarak halo kontratu ho nain hira hodi bele tau iha publisidade liuliu iha ita-boot sira-nia jornal”, dehan Ministru Francisco wainhira remata asina kontratu husi mídia sira iha Palásiu governu, segunda(12/04).

Ho desizaun ne’e, laiha intensaun kesi jornalista sira hodi tuir governu nia hakarak maibé intensaun mak oinsá bele servisu hamutuk.

“Ita-boot sira halo ita-boot sira-nia papel, ami halo ami-nia papel, maibé papel ida atu luta kontra moras covid-19 ne'e ita hotu luta ba ida ne'e, atu nunee halo prevensaun no halo vasina ho di’ak, para populasaun sira bele hakmatek”, dehan ministru.

Ba futuru populasaun mós hola parte no imunidade ba sira mós iha forte atu nune’e bele luta hasoru moras ida ne’ebé ema nunka hatene bainhira mak hotu.

Maibé fiar katak bainhira hothotu hetan ona vasina maske moras ne'e eziste mós sei ultrapasa no hala'o filafali atividade ho normal.

Kontratu hotu bazeia ba proposta husi mídia imprime kona-ba publisidade no informasaun maibé seidauk to'o iha pájina tomak (full page).

"Tamba ita halo kontratu ona, ida ne'e ita sei haree no halo kooperasaun ba malu hodi ba futuru ita sei servisu hamutuk nafatin”, afirma Ministru. (*)