Hafoin akontese dezastre naturál ne'ebé rezulta infraestrutura barak estragu, mak Prezidente Institutu Jestaun Ekipamentus,institutu públiku (IJE,ip), Ermenegilda da Costa Laurentina hatete, sira-nia parte foin simu kompaña Timor Port mak fó apoiu gratuita hodi normaliza mota Bekussi nian.

"Ha'u so hatene kompaña Timor Port de'it mak apoiu gratuita, maibé informasaun ne'ebé mak ha'u iha, kompaña parese 15 resin ona mak halo hela servisu iha Dili laran, 15-resin ne'e ha'u hanoin ba oin governu sei halo pagamentu iha situasaun emerjénsia”, dehan nia iha kna’ar fatin kolmera, tersa (13/04).

Kompaña Timor Port fó apoiu ekipamentus hodi servísu hamutuk ho IJE mak hanesan, exa ida, loder rua, no fuzu rua.

"Empreza ne'ebé mak mai atu apoiu gratuita ba governu halo servisu, hanesan agora dadaun mai apoiu IJE ninia servisu iha mota Bekusi, ida ne'e kompaña Timor Port oferese ninia mákina tolu, exa ida, loder rua ho Fuzu rua, apoiu hela servisu ida ne'e ho gratuita, entaun ami bele simu servisu ho ami”, dehan nia.

Empreza sira ne'ebé hala'o servisu atu ba futuru governu selu ne'e, mak Prezidente IJE deside kedan atu labele servisu ho IJE,ip.

"Deside kedas labele servísu ho ami para ida-idak ho ninia volume servísu, aprezenta ida ne'e para bele pagamentu tuir ida ne'e”, afirma nia. (*)