Hafoin Primeiru-Ministru Taur Matan Ruak sábadu fim de semana ne’e, halo tiha observasaun ba fatin afetadu husi kalamidade loron 4 fukan-abril semana kotuk iha Dili laran.
Tanba ne’e, konvoka reuniaun ida ho Vise Primeiru Ministru no Ministru Planu Ordenamentu, José Reis no Ministru Obras Públika, Salvador Pires, iha salaun Ministériu Finansas, Ai-tarak Laran, hodi buka hatene progresu prosesu levantamentu, partikularmente ba estrada diresaun Praia dos coqueiros ne’ebé monu iha Embaixada Japaun nia oin.
“Iha reuniaun ne'e, Xefe Governu orienta tékniku MOP no ADN sira atu prosesa lalais levantamentu, se di’ak liután loron ida ka rua oin mai, indika ona Kompaña hodi mobiliza ekipamentu pezadas hodi bele halo ona reabilitasaun emerjensia ba estrada refere, tanba estrada ne’e tama iha kategoria dalan protokolu ne’ebé presija normaliza lalais”,dehan karta Komunikadu ne’ebé www.tempotimor.com asesu husi Gabinete PM iha loron sábadu (10/04).
Maibé, tékniku sira afirma, dezeñu prontu ona no dadaun ne’e iha hela verifikasaun ADN nian, no hein katak iha loron ida ka rua tan bele ona implementa.
“Tékniku MOP mós esplika se kompaña indikadu iha kapasidade no volume serbisu di’ak iha kaer obra, garante to'o semana ida estrada refere bele ona normaliza fali ho fui alkatraun”, dehan.
Xefe Governu husu atu indika kompaña ne’ebé iha kapasidade finanseira no material nune'e bele kaer obra ho di'ak. (*)