Nune'e, iha ona kriasaun ekipa 6, ne'ebé ho objetivu atu halo levantamentu identifikasaun, nomós klarifikasaun ba danus prejuizu ne'ebé mak husi kalamidade foin loron 4 fulan-abríl ne'e, iha Dili laran, nomós Munisípiu sira seluk.

Vise-Primeiru Ministru, no Ministru Planu Ordenamentu Territórial (MPOT), José Maria dos Reis, afirma ekipa téknika 6 mak hanesan, Agensia Dezenvolvimentu Nasionál (ADN), Ministériu Obrás Públiku (MOP), Bee Timor-Leste, E,P (BTL,ep), Eletrisidade Timor-Leste, E,P (EDTL,ep), Grande Projetu, Diresaun Jerál Ambiente.

“Objetivu reuniaun KAFI extraordinária ida ne'e, ho prezensa Primeiru Ministru nian, enkontru ida ne'e atu fó argumentu ba despaixu Primeiru Ministru nian iha dia 04 de Abríl, kona-ba ekipa téknika ne'ebé mak hari’i husi kriasaun 6”, dehan nia hafoin reuniaun KAFI iha edifísiu Ministériu Finansas, sesta (09/04).

Projetu ne'ebé importante no urjente atu halo ne'e, depende ba levantamentu dadus, ne'ebé ekipa séi hala'o iha tempu badak.

"Iha mós planu rekoperasaun ba projetu ne'ebé mak impórtante tebes, no urjente atu halo ba rekoperasaun nian, ne'e dependedu ba levantamentu de dadus, identifikasaun ne'e hotu ona, foin KAFI reuni fali atu haree lolós ida ne'ebé mak urjente atu halo, no ida ne'ebé mak tuir prosesu normál”, dehan nia

Tanba ne'e, deside ona, no hein ekipa ne'ebé halo servisu levantamentu identifikasaun durante semana rua.

"Tanba, serka sánitaria iha Dili la'o hela, mezmu horseik (08/04), halo tiha ona levantamentu ba konfinamentu, tanba ida ne'e mak ekipa teknika antes sai ba Munisípiu seluk, ami sei husu mós ba Sentru Integradu Jestaun Krize, atubele fasilita lalais sira sai husi ne'e ba Munisípiu seluk para halo levantamentu ida ne'e”, haktenik nia.

Ba tendederizasaun projetu, sei iha partisipasaun husi empreza nasionál, no internasionál, hafoin bele haree hodi deside kompaña ne’ebé mak priense kriteria.

Iha rekoperasaun ne'e mós, séi deside prosesu ruma atu asegura kuadru legál, hafoin téknika sira hodi hala'o.

"Tanba, ida ne'e mak ohin ami deskute, ita labele halo sala filafali, tinan seluk uluk, tudu buat hothotu la'o para bele asegura kuadru legál ida, hodi tékniku sira bele hala'o”, esplika nia.

Nune'e mós, fó atensaun katak ekipa juridiku sira sei tur hamutuk atu deskute oinsá mak situasaun sira ne'ebé urjenti atu halo, no ninia prosesu ne'e mós tenke iha espesiedade ida, maibé tenke asegura iha kuadru legál ida. (*)