Haree ba kualidade internet Timor-Leste seidauk di'ak kompara ho nasaun sira seluk, tanba ne'e governu atraves MTK jere hela kapasidade internet 200 MpS (Mega Byte per Second).

Enkuantu, teknolojia internet iha mundu anteriormente hahú ho Kilobyte kontinua Mega byte (MbpS), hasa'e ba Giga byte e dadaun ne'e mundu utiliza terabyte maibé iha Timor-Leste sei utilija MpS pior liután iha deit kapasidade 200 MpS.

Husi 200 MpS ne'e rasik distribui ba ajénsia governu hamutuk 196 ne'ebé fahe ba 140 ajénsia iha Munisípiu no 56 ajénsia iha Kapital Dili.

"Politika governu nian, 200 Mps ita hasa'e ba 1 Giga byte, ita sei ko’alia 1 giga ema ko’alia Terabyte, 1 Terabyte ekuivalente ho 1 millaun MpS. Ema ko’alia millaun MbpS, ita ko’alia 200 MpS, iha liu kotuk, triste tebes situasaun ida ne'e”, dehan José iha nia-kna’ar fatin MTK-ANC Kaikoli Dili, sesta (09/04).

Governante ne'e lamenta ho dezempeñu husi operador telekomunikasaun tolu iha Timor-Leste ne'ebé kestionavel relasiona ho kliente nia lamentasaun hasoru operador nia atendementu.

Ho velosidade internet ne'ebé lentu (neneik) difikulta servisu kliente ka subscriber sira inkluidu institusaun governu.

"Iha oras ne'e dadaun hanesan ema hotu hatene ita-nia reuniaun konsellu ministru mós atravez husi zoom maibé rede (internet) orsida funsiona, orsida monu (down) situasaun ida ne’ebé ladi’ak, la fasilita," dehan José.

Governu liuhusi MTK atraves ANC buka meus hotu atu aselera prosesu tomak hodi buka solusaun ligadu ba problema internet ne'ebé lentu iha Timor-Leste hanesan fasilita kompaña sira ne'ebé halao operasaun iha área Internet Service Provider (ISP) liuhusi atribusaun sertifikadu no lisensa hodi ajuda prekupasaun tomak aktual.

Antes ne'e mosu lamemtasaun públiku sira relasiona ho velosidade internet ne'ebé dadaun ne'e "lenuk" nune'e difikulta ajénsia governu, kliente no públiku utilizadór internet iha Timor-Leste.(*)