Maske, iha ona desizaun atu sobu ponte refere, maibé sei hein ekipa ne'ebé halo levantamentu dadus identifikasaun ba fatin estragu sira, no dezeñu foun.

Vise Primeiru Ministru no Ministru Planu Ordenamentu Territórial (MPOT), José Maria dos Reis hatete, atu sobu ponte Bekussi, tama ona iha planu rekoperasaun ba infrastrutura ne'ebé hetan estragu husi dezastre naturál.

"Antes atu sobu ida ne'eba (Ponte Bekusi), ita tenke iha ona dezeñu ida para halo, sé ita sobu tiha, asesu ba iha Bekussi sorin ba Taibesi susar ona, tenke halo fali dezeñu ida, maibé iha ona atensaun mós iha pakote rekoperasaun, ponte Bekussi tama iha prioridade iha ida ne'e para atu halo”, dehan nia hafoin reuniaun extraordinaria Komisaun Administrasaun Fundu Infrastrutura (KAFI) iha edifísiu Ministériu Finansas, sesta (09/04).

Nune'e, ponte ne'e sei sobu iha tempu badak, bainhira dezeñu foun prontu ona, maibé dadaun ne’e seidauk bele sobu.

"Séi sobu iha tempu badak kuandu dezeñu prontu ona, ha'u hanoin prosesu ida ne'e tékniku sira komesa halo dadaun ona", afirma nia.

Razaun atu sobu ponte refere, tanba komúnidade sira sempre sai vítima bainhira udan no mota boot tun.

Ponte Bekussi Sentru ho tipu estrutura box 6 cells hahu ninia konstrusan iha loron 15 Fulan-novembru 2016, no remata iha loron 31 fulan-julho 2018, kontratu inisial ho montante orsamentu hamutuk $ 674,456.62 ne'ebe responsabiliza husi kompanhia Marabia CCS Unip. Lda. (*)