Tempotimor (Dili) - Posibilidade Parlamentu Nasional (PN) sei halo proposta alterasaun orsamentu tokon US$200 atubele apoiu governu responde Dezastre Naturál (DN) ne’ebé nasaun enfrenta.
Prezidente Komisaun C (trata asuntu Finansa Públika) iha Parlamentu Nasional deputada, Maria Angelica Rangel hatete, hafoin iha loron 31 fulan-marsu governu haruka proposta orsamentu retifikativu ho montante tokon US$223 ba PN, atubele responde ba covid-19 iha TL.
Maibé, iha loron 4 fulan-abril, Timor-Leste enfrenta tan dezastre naturál ida ne’ebé la espera, halo povu barak mak sai vítima, enkuantu atu responde ba situasun emerjénsia ida ne'e governu presiza tan osan hamutuk tokon US$200.
Tanba ne'e, Parlamentu Nasionál deside sei servisu hamutuk ho governu oinsá mak bele halo ezersisiu ba montante orsamentu ne’ebé sei prevee ba iha fundu dezastre naturál inklui ba fundu covid-19.
"Proposta Orsamentu Retifikativu, Governu submete mai iha dia 31, depois halo karakter urjénsia. Afinal ita hetan tan dezastre boot ida iha dia 4, ita la espera, e governu la tau osan ba ida ne'e. e horseik iha dia 8, iha reuniaun líder bankada Ministru MAPKOMS, hato'o katak governu presiza orsamentu ba dezastre naturál ne'e, purvolta de 200 milhões”, dehan nia iha PN, sesta (9/4).
Tuir regra wainhira governu hatama ona proposta mai iha PN, governu sei labele halo alterasaun ruma, tanba ne'e konpeténsia PN nian mak sei halo ezersisiu.
"Ida ne'e ezersisiu boot ida ba parlamentu nasionál atu halo, hodi bele halo alterasaun ba rubrika ka kategória balun, hodi tau fali ba fundu ne’ebé sei halo, hanaran fundu dezastre naturál”, dehan nia.
Montante ne’ebé mak PN seidauk bele adianta, tanba rezultadu tetu orsamentu sei nafatin, maibé sei halo ezersisiu ba Ministériu balun ou ba orsamentu balun ne’ebé mak seidauk prioridade atu halo alterasaun hodi tau ba situasaun emerjénsia ida ne'e.
Xefe bankada KHUNTO, Olinda Guterres konsidera importante tebes atu parlamentu nasionál bele servisu hamutuk ho governu hodi solusiona situasaun rai laran, hanesan covid-19 no dezastre naturál.(*)