Print this page

Governu Estende Serka Sanitária Ba Baukau no Vikeke

Tempotimor (Dili)- Governu liuhusi Konsellu Ministru deside atu estende serka sánitaria iha Munisípiu Baukau ho Vikeke ba loron hitu, no suspende mós konfinamentu domisiliáriu obrigatóriu.

Nune'e, atividade no movimentu ema nia iha Munisípiu rua ne'e, bele la'o normál fali, maibé atividade prosesu aprendizajen, desportu, no misa seidauk autóriza atu hala'o, tanba akumula ema barak fasil atu habelar virus Covid-19.

Ministru Prezidensiá Konsellu Ministru, Fidélis Leite Magalhães hatete, konfinamentu domisiliáriu obrigatóriu mak suspende, maibé serka sánitaria kontinua funsiona, tanba ne'e la autóriza ema atu viajen ba Munisípiu sira seluk.

Ema sira ne'ebé presíza atu viajen ba Munisípiu seluk, dalan mak tenk halo teste SWAB, bainhira rezultatu hatudu laiha moras Covid-19 hafoin bele ba.

"Konsellu Ministru mós aprova rezolusaun governu nian atu mantein inpózisaun serka sánitaria ba Munisípiu Baukau ho Vikeke ba loron 7 tán, maibé konfinamentu domisiliáriu obrigatóriu ba Munisípiu Baukau ho Vikeke suspende hotu”, Dehan nia liu husi konferensia impresnsa hafoin reuniaun Konsellu Ministru iha palásiu governu, kinta (08/04).

Maske, suspende ona konfinamentu domisiliáriu obrigatóriu, maibé nafatin husu ba ema hotu atu kumpri regra prevensaun Covid-19 hanesan, uza máskra, distansia sosiál, fase liman bei-beik. (*)

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items