Iha atividade ne'e, partisipa direta husi Sekretáriu Estadu Kooperativa (SEKOOP), Elizário Ferreira, Sekretáriu Estadu Juventude no Desportu (SEJD), Abrăo Saldanha "Nokosiku", no husi Ministériu Turízmu Komérsiu no Indústria (MTKI), reprezenta husi Visé Ministru, Domingos Antunes Lopes, inklui funsionáriu sira.
Rute limpeza ne'ebé ekipa ne'e hala'o, hahú husi Ponte mota Maufelu nian iha estrada diresaun ba terminal Bekora, tun to'o ponte Bidau besik Ospitál Bidau Toko-Baru ka oras ne'e kuñesidu ona ho Hospitál Nasionál Guido Valadáres (HNGV) nian.
Tuir observasaun www.tempotimor.com iha terrenu nota katak, maiória funsionáriu sira husi SEKoop nian uza hotu uniforme limpeza nian "trainning", balu lori ho ida-idak nia ai-suak kanuru suru rai hodi suru taho sira no ajuda husi mákina eskavatór ne'ebé suru foer hodi tula ba karreta.
Entretantu, Sekretáriu Estadu Juventude no Desportu (SEJD), Abrăo "Nokosiku" Saldanha mós mobiliza membru GAM tolu hanesan PSHT, Kera Sakti, KORK no Arte Ritual 77 hodi ajuda halo limpeza lisuk taho sira iha área Bidau Mota Klaran, Suku Bidau Santana, Postu administrativu Cristo Rei, Munisípiu Dili. (*)
