Antes ne'e governu hasai rezolusaun hodi impoin serka sanitária no konfinamentu domisiliáriu obrigatóriu iha Munisípiu Dili to'o loron 14 fulan-abríl tinan 2021, hodi taka hotu loja konstrusaun sira, maibé mosu inundasaun ne'ebé afeita tebes ba komúnidade mak obriga hodi loke hikas loja sira.

Nune'e, governu liuhusi reuniaun interministerial deside hodi fó ona autórizasaun ba loja fa'an sasán konstrusaun atu loke fali.

"Governu ohin halo desizaun ida katak, ba loja sira ne'ebé mak fa'an matéria konstrusaun ou sasán konstrusaun sira, bele loke fila-fali, para bele fa'an matérial bangunan sira ba iha ita-nia komúnidade sira atu sosa hodi hahú servisu iha sira-nia uma”, dehan Ministru Prezidensiá Konsellu Ministru, Fidélis Leite Magalhães, iha palásiu governu, segunda (05/04).

Aliende ne’e, autórizasaun mós restaurante sira kontinua loke hodi fa'an ai-han manas atu komunidade sira ne'ebé vítima ba inunndasaun bele asesu.

"Tuir mai apela mós ba hirak ne'ebé fa'an ai-han hanesan restaurante, warung sira permitidu hela tuir regra atual, maibé husu filafali sira atu halo duni sira ninia servisu para ita bele hola ai-han manas husi sira para fó ba sé de'it mak membru komunidade hirak ne'ebé presíza”, dehan nia.

Tanba "Rezime ne'ebé ita iha mak, take way katak, ita husu para warung, restaurante sira bele loke filafali para ita bele ba hola lori ba iha maluk sira ne'ebé mak presíza”, reforsa.

Maibe, akontese inundasaun família barak ne'ebé servisu iha loja mós afeitadu.

"Horseik iha problema tanba inundasaun boot hotu, entaun difísil atu hetan ai-han, loja sira hotu, família ne'ebé servisu iha loja sira mós barak mak afeitadu hotu”, afirma. (*)