Print this page

PM Taur Orienta MOP ho MPOT Sobu Ponte Taibessi Aban

PM Taur Matan Ruak ho Vise PM Jose Reis observa ponte Taibese, Tersa (6/4) PM Taur Matan Ruak ho Vise PM Jose Reis observa ponte Taibese, Tersa (6/4) Foto Tempo Timor

Tempotimor (Dili) - Primeiru Ministru (PM), Taur Matan Ruak, orienta Ministru Obrás Públiku (MOP), Salvador Pires, no Ministru Planu Ordenamentu Territórial (MPOT), José Maria dos Reis, atu organiza ekipa hodi sobu sai ponte iha Taibessi, iha loron kuarta (07/04).

Ponte ne’ebé kada tinan udan boot sempre lori inundasaun ba komúnidade sira ne'ebé hela besik, hanesan mós iha tinan 2020.

Ho situasaun ne’e xefe Governu promete sei sobu ponte ne'e iha loron kuarta (07/04), hodi hari’i fali foun, tanba ponte refere la merese halo ho modelu ida hanesan dadaun.

"Ha'u hakarak informa espesiál ba komúnidade ida ne'e, ha'u tinan kotuk iha ne'e, tinan ida ne'e, ha'u mai tán, sira (komúnidade) levanta problema ida kona-ba ponte ida ne'e, ponte ida ne'e halo hanesan kuartu, tinan kotuk ha'u deskute ho Ministru Obrás Públiku, posibilidade atu sobu ponte ne'e, maibé ohin, ha'u-nia inan ho aman sira iha ne'e, ha'u fó instrusaun ba Vise- Primeiru Ministru, Ministru Obrás Públiku, aban ha'u haree ponte ne'e sobu tiha, halo foun fali”, dehan PM Taur hafoin vizita ba fatin dezastre naturál ponte Taibessi, tersa (06/04).

Taur dehan, kondisaun mota ne’ebé la merese halo ponte ho modelu hanesan kuartu, bainhira udan boot mota lori aí no fatuk mak bee sobu komunidade nia uma ne’ebé besik.

"Ha'u hanesan Primeiru Ministru responsabliza tomak sala hothotu husu deskulpa ba ha'u-nia inan-aman, família sira ne'ebé hela iha ne'e, no ha'u promete katak, ponte ida ne'e ha'u baku rahun halo fali foun ida, para tinan oin mai antes ha'u sai tiha karik, imi labele terus tán ba ponte ida ne'e”, afirma Taur.

Prezensa PM Taur iha terenu atu manifestasaun solidaridade ba família afeitadu sira, no buka atu subu ponte ne’ebé hamosu inundasaun iha tempu udan.


Regina Correa nu'udár komúnidade mós agradese ba prezensa Primeiru Ministru, Taur Matan Ruak, no aseita atu sobu ponte refere, tanba tinan barak ona lori inundasaun ba komúnidade.

"Ami simu desizaun hanesan ne'e, ami simu tiha maun boot (PM Taur), nia lia-fuan hanesan ne'e, pois sira mai halo mak la tuir hanesan maun boot ko'alia, ha'u sei protes nafatin, ne'ebé ami hato'o ami-nia difikuldade, aban ou bainrua mai baku tiha ba”, dehan nia.


Bainhira parte governu mak la sobu rahun ponte refere, komúnidade sei organiza malu hodi baku rahun.

"Sé liu aban ou bainrua, ami povu husi suku rua ne'e, orienta malu baku tebes, ami-nia lia-fuan hanesan ne'e, obrigadu ba governu, obrigadu ba maun boot (PM Taur) bele to'o ona mai ami-nia fatin ida ne'e”, hatete nia.

Primeiru Ministru, Taur Matan Ruak, halo observasaun ba dezastre naturál ne'ebé estraga infrastrutura barak iha Munisípiu Dili, akompaña husi Ministru Obrás Públiku (MOP), Salvador Pires, no Ministru Planu Ordenamentu Territórial (MPOT), José Maria dos Reis.

Nune'e, fatin infrastrutura hetan estragu iha Munisípiu Dili ne'ebé ohin Primeiru Ministru halo ona observasaun mak estrada ne’ebé tohar iha Kampun-Alor embaixada Japaun nia oin, Mota Komoro, Manleu Bedoku, Maloa, Bidau, Bekora, Hera, no remata iha ponte Taibessi. (*)

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items