Print this page

CNRT ‘Dun’ Governu Nia Inkapasidade Hamosu Inundasaun

Deputadu bankada CNRT, Leandro Lobato, ko'alia ba Jornalista iha Parlamentu Nasional Deputadu bankada CNRT, Leandro Lobato, ko'alia ba Jornalista iha Parlamentu Nasional Foto Arkivu

Tempotimor (Dili) - Bankada Congresso Nacional de Reconstrução de Timorense (CNRT) iha Parlamentu Nasionál (PN) 'dun' inkapasidade husi governu mak hamosu inundasaun.

Deputadu bankada CNRT, Leandro Lobato hatete, situasaun dezastre naturál ne'ebé povu hasoru iha terenu tanba governu mak laiha kapasidade atubele uza meiu hodi prevene.

"Bankada CNRT husu ba Governu de Faktu atu uza rekursu no meius hothotu ne’ebé iha hodi responde ba situasaun povu nian ne’ebé oras ne’e hasoru susar no terus oioin husi inkapasidade Governu ida ne’e nian”, afirma nia iha plenária PN, Tersa (06/04).

Bankada CNRT mós ezije nafatin ba Governu atu buka lalais solusaun ba ekonomia ne’ebé hakdasak ba beibeik, no responde lalais ba vítima dezastre naturál ne’ebé lakon sasán, lakon uma, lakon mós vida.

Maibé, laiha razaun atu dehan labele, tanba Parlamentu Nasionál aprova ona osan ho montante Biliaun $1.895 atu Governu uza hodi responde ba situasaun nasaun no povu nian.

Aleinde deputadu bankada PD, Mariano ‘Assanami’ Sabino, husu ba governu atu fó apoiu emerjénsia ba vítima inundasaun iha kapitál nasaun iklui iha Munisípiu sira ne’ebé afetadu.

Nia parte lamenta uituan, ho prezensa membru governu nian ne’ebé menus iha terenu, atubele fó atende ba situasaun atual ka inundasaun ne’ebé povu hasoru.

Maske nune’e Xefe Bankada FRETILIN, Francisco Miranda Branco, louva governu nia prontidaun, protesaun sivíl, bombeiru, MSSI, IGE, PNTL, F-FDTL, Cruz Vermella, Estatal no xefe suku no aldeia sira, inklui emprezáriu sira nebé mobiliza esforsu tomak hodi tulun vítima sira ne’ebé presiza apoiu.

Louva mós inisiativa solidariedade husi individu no grupu sira ne’ebé presta apoiu umanitáriu ba vítima sira husi inundasaun ida né'e. Nomós ba sidadaun sira ne’ebé organiza malu hodi tein no han hamutuk, hamos lisu uma no iha bairu-laran, be dalan no estrada hodi tulun governu.

Aleinde louva mos ba Madre sira iha Dili laran nebé oferese ona sira nia fatin ba simu no atende vítima husi inundasaun no rai monu. (*)

Rate this item
(0 votes)
Last modified on Tuesday, 06 April 2021 22:28
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items