Iha tinan 2020, Timor-Leste rejista kazu covid-19, maibé ema barak la fiar, até líder politiku balun mós konsidera covid-19 politika, maibé iha loron tersa (06/04), covid-19 hahú hamate ona timoroan ida iha sala izolamentu Lahane.

Ho kestaun ne'e, Vise Xefe Bankada CNRT, Patrocinio Fernandes dos Reis hato'o ninia sentidu kondolensia profunda ba família matebian, ne’ebé mk mate ho covid-19.

"Hato'o de'it ami-nia sentimentu, partila de'it ami-nia sentidu kondolénsia ba ida ne'e, ne’ebé ida ne'e la'ós politika nian be, atu dehan iha fali ema ida nia partidu nia pozisaun ba fali pozisaun”, dehan nia PN, tersa (6/4).

Maibé, kestaun covid-19 hamate timoroan ida iha izolamentu ne'e, bankada CNRT rasik seidauk hetan informasaun kompletu kona-ba saida.

Tanba ne'e, propoin ba governu, karik pasiénte ne'e mate duni tanba covid-19, ne'e hatudu katak governu tenke tau atensaun maka’as liután hodi haree ba situasaun ida ne'e.

Deputadu Patrocino deklara iha dader ne'e sira simu duni informasaun katak, pasiénte ne'e iha moras komplikadu nanis ona.

"Tuir informasaun hanesan ami rona dadauk, pasiénte ne'e iha moras komplikadu nanis ona, no pasiénte ida ne'e sofre rins, fase rán, buat sira ne'e hotu, atraza situasaun sira iha semana hira liu ba kotuk, iha Hospital Nacional Guido Valadares, depois ho ema sira ne’ebé atu fó asiestensia fase rán ne’e, deteta tiha dehan covid, e para tiha la fase rán, ba ema sira ne'e, ikus mai ema ne'e, kondisaun sai hanesan ne'e”, nia konta tuir.

Iha fatin hanesan Deputadu bankada Partidu Demokratiku (PD), Mariano ‘Asanami’ Sabino husu ba populasaun no sidadaun hotu atu nafatin vizilansia no kuidadu-an, nune'e bele kontribui kombate moras covid-19 ihaTimor-Leste.(*)