Ho ida ne'e, Primeiru Ministru, Taur Matan Ruak, manifesta ninia solidariedade no kondolénsia ne’ebé kle'an ba família ne’ebé lakon nia ema kauza husi dezastre naturál.

“Ha’u-nia laran-triste tebes wainhira haree dezastre naturál ka udan bot ida ne’ebé hamosu estraga maka’as no halakon komunidade nia vida. Aproveita momentu susar ida-ne’e hakarak fahe ha’u-nia sentimentu solidariedade ba vítima sira no família vítima sira-nia sofrimentu”, afirma Taur liuhusi komunikadu impresnsa ne'ebé www.tempotimor.com asesu, domingu (04/04).

Ho laran triste, PM Taur fó sentimentu solidariedade ba vítima inundasaun ne’ebé mosu iha Kapitál Dili nomós Munisípiu sira seluk.

"Hodi Governu no ha’u-nia naran rasik hakarak hato’o ha’u-nia solidariedade no kondolénsias ne’ebé kle’an ba família matebian sira ne’ebé mak sofre husi inundasaun ida-ne’e”, PM Solidariza

Ho situasaun ne'e, governu sei halo esforsu hotu hodi ajuda família vítima sira.

“Ikus, ha’u-nia orasaun hamutuk ho vítimas no família sira. Ha’u dezeja forsa iha tempu susar ida-ne’e no hein katak ita-hotu sei ultrapasa husi sofrimentu ida-ne’e no Governu sei halo esforsu hotu hodi ajuda família sira ne’ebé sai vítima ba dezastre naturál ida ne’e”, dehan Taur. (*)