Governu sei Prepara Kondisaun Molok Autoriza Aviaun Xina Semo iha Timor Featured

PM Taur ko'alia hela ba Midida iha Palasiu Prezidente Ai Tarak Laran, (10/06) PM Taur ko'alia hela ba Midida iha Palasiu Prezidente Ai Tarak Laran, (10/06) Foto Midia PR

Tempotimor (Dili) Governu Konstitusional daualu ne'ebé lidera husi Primeiru Ministru Taur Matan Ruak hatete, nia fó ona autorizasaun ba Ministru Transporte no Komunikasaun hodi prepara kondisaun molok autoriza kompaña aviasaun husi Xina hala’o operasaun iha Timor Leste.

Iha fulan kotuk manajementu Air Timor akompaña husi eis Prezidente Repúblika José Ramos Horta hala’o enkontru ho PM Taur hodi informa kona-ba akordu ne’ebé Air Timor halo ona ho kompaña aviasaun husi Xina no husu ba governu Timor Leste atu fó autorizasaun.

“Ha’u fó ona orientasaun ba ministru transporte no komunikasaun par prepara kondisaun hodi haree ida ne’e, tanba naturalmente ita liga ho pais ida, entaun ha’u espera katak iha tempu badak ita bele ultrapasa ida ne’e,” dehan PM Taur iha palásiu prezidensial Bairro-pite, Segunda (10/06/2019).

Kona-ba Air Service Agreement ne’ebé molok ne’e Horta husu atu governu prepara, PM Taur dehan, governu TL halo ona akordu hanesan ne’e ho nasaun sira seluk no espera katak bele halo mós ho Xina.

“Sim, ha’u autoriza, agora depende, hanesan ha’u dehan, depende ba relasaun ho nasaun seluk, ajenda ne’e tenke haan-malu, mais governu apoiu inisiativa ida ne’e.”

Molok ne’e, Ramos Horta akompaña manajementu Air Timor hasoru PM Taur atu informa kona-ba akordu ne’ebé Air Timor asina ho ho kompaña aviasaun husi Xina.

“Air Timor konsege duni halo akordu ho kompana iha Xina, aviaun foun. Air Timor halo ona akordu, agora hein deit governu nia autorizasaun par aviaun ne’e bele semo Dili ba Xinjiang (Xina),” informa Horta hafoin hasoru-malu ho PM Taur.

Horta esplika, aviaun husi kompaña aviasaun Xina ne’ebé sei mai halo perasaun iha Timor Leste nuudar aviaun foun ne’ebé nia idade seidauk too tinan.

“Aviaun ne’e modernu. Kadeira 134, 8 ba business class. Aviaun foun, seidauk too tinan, ha’u haree tiha ona. Sira halo voo barak, internasional ona. Sira aviaun barak, sira mós hakarak mai Timor.”.

Tan ne’e, Horta hatutan, nia akompaña manajementu Air Timor hasoru PM atu governu TL hahú book an hodi halo akordu ne’ebé hanaran Air Service Agreement, ho governu Xina.

“Ne’e mak ha’u lori sira mai koalia ho PM par haree oinsa governu bele book an lalais halo akordu ho Xina, Air Service Agreement. (akordu entre) governu ho governu tenke halo, ne’e normal, rai hotu-hotu halo,” nia hatete.

Bainhira iha ona autorizasaun legal husi governu, nia hatete, aviaun refere bele hahú ona halo koneksaun TL ho nasaun barbarak iha mundu.

Ho prezensa aviaun ne’e, aleinde koneksaun TL ho nasaun seluk iha mundu sai diak liu tan, bele mós rezolve problema folin bilete.

“(Daudauk ne’e) Ema kobra bilete arbiru ba ita. Ita-nia ajensia viajen laiha. Iha ne’e laos ajensia viajen Timor nian, sira reprezenta deit ajensia viajen Bali nian”.

Horta informa mós katak, aviaun husi Xina ne’e sei mai para iha Timor no parte kompaña sei harii fatin atu tau aviaun refere.

“Aviaun ne’e sei para iha Timor, nia baze sei iha Timor, sira sei halo uma boot ida, ne’e par aviaun ne’e bele tau. Sira sei lori enjineiru, tenkniku par halo manutensaun iha ne’e”.

Kona-ba presu aviaun foun ne’e, Horta garante katak presu sei la karun liu.

“Presu tenke tuun, labele karun. Ha’u koalia ho sira ha’u dehan ideia ne’e diak, ha’u hakarak haree bilete”, dehan Horta.

Rate this item
(0 votes)
Last modified on Wednesday, 12 June 2019 09:39
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Contact us

Palapasu
Dili, Timor-Leste
+670 7723 4852
+670 7728 1698
http://www.tempotimor.com