Iha loron 02 fulan-abríl tinan 2021, maizumenus hahú tuku 05:00 dadeersan, populasaun barak mak sai husi kapitál Dili hakarak fila ona ba ida-idak nia munisípiu ho razaun balu laiha ona hahán no osan.
Maibé, to'o iha Postu entrada Munisípiu Dili, membru sira husi Polísia Nasional Timor-Leste (PNTL), ne'ebé halo hela seguransa iha postu Fatuahi, la fó autorizasaun ba sira atu liu, hodi taka mós dalan.
Ho situasaun ne'e, Segundu Komandante PNTL munisipiu Dili, Superintendente Polísia, Euclides da Costa Belo hatete, nia membru sira kaptura mós sidadaun sira husi munisipiu Manatutu, Baukau, Lospalos ho Vikeke nian hamutuk ema na'in 110, tanba konsidera viola regra Serka Sanitária (SS), ne'ebé dadaun ne'e governu halo hela estensaun.
"Iha parte leste nian, horseik ita komandu PNTL Munisípiu Dili kaptura sidadaun ho totál 110, iha parte leste nian”, hatete komandante Euclides ba jornalista iha nia knaar fatin, sábadu (03/04).
Sidadaun sira ne'ebé kaputura, polísia halo de'it identifikasaun iha komandu PNTL Munisípiu Dili hahú iha tuku 06:00 to'o tuku 07:00, kalan mak devolve ka liberta sira fila ba ida-idak nia uma.
"Para depois sira fila ba ida-idak nia uma, labele komete ba erru ne'ebé hanesan, dezobediénsia ba ita nia regra sanitária, ne'e labele. Ida ne'e mak sira komprende hotu ida ne'e”, dehan nia.(*)