Serka Sanitária Habiit Metin Estudante Hamlaha Iha Díli, Ezije Fila Munisipiu

Estudante no komunidade balun  ne'ebé nadodon tuituir malu iha komoro mota-ulun atu viajem ba munisípiu, maibé la hetan autorizasaun husi governu. Sesta (2/4) Estudante no komunidade balun ne'ebé nadodon tuituir malu iha komoro mota-ulun atu viajem ba munisípiu, maibé la hetan autorizasaun husi governu. Sesta (2/4) Foto Tempo Timor

Tempotimor (Dili) - Haree ba desizaun governu ne'ebé deside hodi aplika Serka Sanitária (SS) iha Kapitál Dili dadaun habiit metin estudante sira to’o hamlaha, tanba labele halo movimentu ba mai Munisípiu.

Desizaun governu ne’ebé iha atu kombate surtu Covid-19 iha Díli laran, maibé husi situasaun ne'e halo ema barak hahú hamlaha inklui osan laiha atu selu alozamentu sira.

Tanba ne’e, estudante sira ne'ebé hela iha kapitál Dili inklui komunidade balun hakarak fila ona ba munisípiu tanba laiha hahán inklui osan hodi selu alojamentu (kost), maibé governu uza forsa Polísia Nasionál Timor-Leste (PNTL) hodi taka dalan ba komunidade sira ne'e.

Maske estudante no komunidade balun hamlaha ona, maibé governu liuhusi Konsellu Ministru (KM) iha loron kinta (01/04) deside ona hodi estende tan serka sanitária iha Dili ba loron 14 tan no loron hotu ba Baukau ho Vikeke.

Nune'e, estudante no komunidade ho volume boot komesa madrugada hakat ona ba pontu entrada tolu Dili nian hanesan Tasitolu, Metinaru no Komoro Mota-ulun, maibé to'o agora governu seidauk hola desizaun ruma.

Claudina da Costa ne'ebé hala'o estudu iha Universidade Nasionál Timor Lorosa'e (UNTL) atu fila ba munisípiu la hetan autorizasau, maibé husu governu atu loke dalan ba sira.

“Ami ezije ba governu atu loke dalan para ami estudante sira fila ba ami-nia munisípiu, agora ami hela iha kost, hahán laiha atu han, depois osan mós laiha ami atu hola hahán, ne'ebé ami ezije ba governu para semana ida ne'e loke dalan para ami ba hamutuk ho ami-nia familia iha foho”, dehan Claudina ba jornalista sira iha komoro mota-ulun, sesta (02/04).

Estudante sira antes ne'e hatama ona formuláriu ba universidade, maibé to'o agora seidauk simu hahán.

"Dezde serka sanitária primeiru kedas to'o agora estende tan ami nunka hetan hahán, ne'ebé ami ezije ba governu atu loke dalan para ami bele fila ba ami-nia munisípiu, agora kost mós seidauk selu, ema kost na'in ezije ona, maibé ami atu foti osan iha ne'ebé mak selu”, dehan nia.

Iha fatin hanesan, Pesoál PNTL sira ne'ebé halo servisu iha Komoro mota-ulun haree katak volume estudante sira komesa aumenta, mak sira hola pozisaun ho toa hodi duni fila estudante sira ne'e husi pontu entrada refere.

“Husu ba ita-boot sira bele fila ba uma, ba hakmatek iha uma, ita mesak ida de'it, timoroan hotu, tanba ne'e favór ida bele fila ona. Ba motorizada sira favór ida bele fila ona, se para kleur iha ne'e karreta mak sei mai tula ita-boot sira-nia motorizada lori ba Kaikoli, ne'ebé di'ak liu fila uma”, dehan pesoál PNTL ho inisiál H ne'e ba estudante sira.

Alende estudante no komunidade balun hein hela iha pontu entrada Komoro Mota-ulun ne'e, iha pontu entrada Tasitolu no Metinaru ne'ebé estudante sira lubun boot hein hela hodi ezije ba governu atu loke dalan ba sira fila ba ida-idak nian munisípiu.

Hatan ba ezijensia ne’e segundu komandante PNTL, Mateus Fernandez dehan ema iha direitu atu ba foho maibé tenke tuir regra ne’ebé fó sai ona katak tenke ba tuir teste swab no autorizasaun husi Centro Integrado Gestao Crise (CIGC, Sigla portuges).

“PNTL nafatin assegura lei nunee lá autoriza se de’it sai husi Dili wainhira la iha guia de Marca husi CIGC tan ba ne’e ohin ami husu maluk sira fila ba uma,” dehan Mateus Fernandez ba www.tempotimor.com, sesta (02/04).

Maibé, M. Soares hatete, nia parte husu CIGC atu hatuur mekanizmu ida mak profesional no efetivu iha atendimentu sira.

“Sira husi sentru integradu jestaun Krize la hatudu seriedade konaba ami-nia aplikasaun sira depois sira-nia método atendimento ladiak”, dehan Soares. (*)

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com
Darwin_Optic

.

Contact us

Palapasu
Dili, Timor-Leste
+670 7723 4852
+670 7728 1698
https://www.tempotimor.com

Kalendariu Arkivu

« December 2021 »
Mon Tue Wed Thu Fri Sat Sun
    1 2 3 4 5
6 7 8 9 10 11 12
13 14 15 16 17 18 19
20 21 22 23 24 25 26
27 28 29 30 31    

Tempo Timor Networks

Online Counter