Ministériu Saúde mós iha ona planu ba vasina dahuluk sei fó prioridade ba pesoál sira iha liña frente.

"Ita boot Sira hatene Vasiana ne'ebé atu to'o hamutuk 24 mill doses, ita fahe nafatin ba prioridades ne'ebé ita mensiona beibeik hanesan front liñe/ liña, mak hanesan pesoál saúde, F-FDTL, PNTL, mídia, Imigrasaun, Alfandega, Aeroportu inklui mós ema sira ne'ebé moras nomós ema ne'ebé ho idade mais 60 anos”, deklara Odete hafoin partisipa atividade handover iha Kampung Alor, Sames, kinta (01/04).

Planu preparasaun ba programa atividade neen ne’ebé mak Ministériu Saúde halo molok fó vasina ida mak advokásia, enumerasaun kona-ba dadus iha territóriu laran, no korente malirin, depois atividade seluk reasaun adverse no ikus liu mak monitorizasaun avaliasaun.

"Ita espera katak ho 24 mill doses ne’e, ami bele kobre ona balun husi Front Line ne'e rasik, ne'ebé vasina ne'e sei to'o iha loron 5 fulan-marsu ne’e, ita espera katak ita sei hahú karik planu iha loron 7 fulan-marsu sei halo lansamentu depois ita destribui ona ba munisípiu sira”, dehan nia.

Vasina AstraZeneca ne'e sei fahe ba munisípiu tomak nuné mós halo vasinasaun ne'e iha munisípiu sira hotu.

"Fatin ba vasina ba 20 pursentu ita hili mak fasilidade saúde signifika katak, ha'u fó ezemplu iha Dili ita sei hili sentru saúde haat inklui Hospital Nasonal Guido Valadares no fatin sira ne'e mak ita sei uza ba loron vasina nian”, afirma Odete.

Kona-ba vasina AstraZeneca ekipa advokasia sei fó sai mós iha mídia kona-ba fatin vasina, mekanizmu oinsá atu rejistu hodi asesu ba vasinasaun.(*)