Ministru Prezidensiá Konsellu Ministru, Fidélis Leite Magalhães, informa Serka Sánitaria, no konfinamentu domisiliáriu obrigatóriu ba Munisípiu Dili sei aumenta tán loron 14, no Baukau ho Vikeke aumenta ba loron 7 tán.
Nune'e, manutensaun impozisaun serka sanitária no konfinamentu domisiliáru jerál populasaun nian iha munisípiu Dili to’o oras 23:59 loron 17 fulan-abríl tinan 202, no iha Munisípiu Baukau no Vikeke to’o oras 23:59 loron 10 fulan-abríl tinan 2021.
"Konsellu Ministru mós ohin aprova pontu sira tuir mai ne'e, ida maka Konsellu Ministru deside atu mantein impoin serka sánitaria no konfinamentu domisiliáriu obrigatóriu ba iha populasaun Dili, aumenta tán hafoin dia 02 de Abríl, aumenta tán loron 14, regra jerál labele sai husi uma”, dehan Fidélis hafoin reuniaun Konsellu Ministru konferensia Zoom, kinta (01/04).
Desizaun governu nian ne'e mós deside, Polísia Nasionál Timor-Leste (PNTL) iha kbi’it atu kontrola di'ak liután movimentu ema nian iha fatin públiku.
"Serka Sánitaria no konfinamentu domisiliáriu obrigatóriu iha Baukau, Vikeke, ba Munisípiu rua ne'e, Konsellu Ministru deside atu estende kontinua, mais ba loron 7 tán de'it, hafoin loron 7 mak halo avaliasaun”, dehan nia.
Tanba ne'e, sidadaun hotu husi Munisípiu tolu ne'e, sei mantein kumpri regra serka sánitaria nian hanesan hela metin iha uma, labele sai bá fatin públiku, bainhira laiha nesesidade urjente. (*)
