Xefe Suku Bibileo, Maria Odete do Santos Amaral hatete, udan ne'e kuaze loron 4 ona, no iha loron kuarta (31/03) udan hahú husi dader to'o kalan, entaun mota boot konsege tama komúnidade barak nia uma iha aldeia Mane Klaran, Fatuhosan no Lakuwai.

"Horseik iha ne'e (bee) tama komúnidade nia uma ne'e husi parte aldeia Lakuwai, kuaze maioria tama to'o uma laran. Udan ne'e konta horseik loron haat ona, udan ho anin hanesan ne'e hela de'it, horseik ne'e mak boot liu kedan, bee tama to'o estrada laran”, dehan nia ba www.tempotimor.com, liuhusi telemóvel, kinta (01/04).

Iha inundasaun ne'e, tanba udan boot, entaun mota betuku nian ne'e, naresin tama fali mai komúnidade sira nia uma.

“Mota Betuku nian ne'e, iha ituan Daumali nian ne'e bronjo sira hada la as, la to'o metru, entaun mota boot naresin, entaun tama fali mai suku laran”, dehan nia.

Inunndasaun ne'e, afeita tebes ba komúnidade, tanba bee tama uma laran, atu tein han, no toba mós la di'ak. Maibé, dadaun bee tun oituan.

Nune'e, autóridade sira sei foti dadus kona-ba komúnidade hira mak afeita inundasaun, no sasán estragu sira.

Totál populasaun iha Suku Bibileo hamutuk, rihun 3.205, ne'ebé kompostu husi aldeia 8. (*)