Haree ba velosidade rede ne’ebé telekomunikasaun rua ne’e oferese la’o neneik hodi bele prejudika no hamohu pakete husi kliente sira.

Tanba ne’e, Deputadu Bankada Partidu Demokratiku (PD) iha Parlamentu Nasionál, Adriano do Nacimento kestiona maka’as kompaña fornesidór hanesan Timor-Telecom (TT) inklui Telemor, tanba ofereee rede telekomnikasaun ka internet, ne’ebé la'o neneik.

"Ita-nia telekomnikasaun hanesan Timor-Telekom ho Telemor, rungu-ranga, la'o hanesan lenuk”, lamenta nia iha plenária PN, segunda (29/03).

Ho liña telkomunikasaun liliu rede internet ne’ebé la di’ak, sei halakon povu no nasaun ida ne'e ninia komunikasaun ne’ebé stavél.

Ne'e duni, husu governu atu haree, tanba mesmu iha serka sanitária nia laran presiza halo servisu ho di’ak tanba sira hetan osan husi governu.

Deputadu PD ne'e duvida ho politika ne’ebé mak kompaña sira halo ne'e, tanba sidade Dili mak serka sanitária maibé la'ós internet.

“Covid-19 mak kona hotu kedan ona sira, ka serka sanitária hotu kedan, ka internet mós serka sanitária ba mai la di’ak”, kestiona nia.

Antes ne’e, Prezidente Komisaun G trata asuntu edukasaun iha Parlamentu Nasionál (PN) Deputadu, Antonio Verdial, konsidera dadaun, estudante balun hasoru difikuldade uituan ho rede internet ne’ebé la'o neneik hanesan "manduku" tanba difísil ba sira atu asesu atividade eskola ho online.

"Ita ko’alia kona-ba buat ida naran online, primeiru ita haree mós realidade, liña rede internet de'it, Timor-Telecom, Telkomsel, no Telemor, la'o de'it hanesan manduku, ne'e primeiru”, dehan nia iha Pn, sesta (26/03).

Aleinde problema seluk ne'e kona-ba fasilidade hanesan telemóvel android atubele halo no liga WhatsApp, nomós bele liga ba sira seluk, dala barak estudante balun ladun hatene uza.

"Liuliu ita-nia oan sira ne’ebé hela iha área ne’ebé mak remota, no estremamentu remota”, dehan nia.

Tanba ne'e, husu ba governu presiza kria kondisaun ida ne’ebé sufisiente atubele responde ba prosesu aprendijazen estudante sira-nian iha ambitu serka sanitária.

"Atu hatan ba situasaun hirak ne'e hotu, inportante mak governu liuliu Ministériu edukasaun juventude no desportu (MEJD) no Ministériu Ensinu Superior no Siensia Kultura, (MESSK), presiza kria kondisaun ba, hodi atende asuntu sira hanesan ne'e, wainhira ita la kria kondisaun, klaru katak, difikulta tebtebes ensinu aprendijazen iha territóriun tomak”, rekomenda nia.

Deputada bankada Partidu Libertasaun Popular (PLP), Maria Angelina Lopes Sarmento hatete, maske iha serka sanitária ne'e, governu suspende atividade eskolar maibé iha dalan seluk atu estudante sira kontinua eskola.

Nu’udar deputadu la konkorda ho ejizensia inan-aman nian ne’ebé husu atu transporta filafali sira-nia oan ba Munisípiu ida-idak.

Maibé husu nafatin ba governu atu kontinua tau atensaun liuliu aselera apoiu umanitária ba estudante sira iha Kapitál nasaun.

Hatan ba kestaun ne'e, Sekretáriu Estadu Komunikasaun Sosial (SEKOMS), Mericio Juvinal Akara hatete, nia parte apresia ho kritika sira ne'e hotu. Maibé governu rejista ona no sei informa ba Ministériu Tranporte no Komunikasaun (MTK) atubele responde ba preokupasaun deputadu nian. (*)