Deputadu Bankada PD, Adriano do Nacimento hatete, governu iha obrigasaun kria regra serka sanitária hodi prevene covid-19, maibé tenke buka dalan ida solusiona populasaun nia preokupasaun.

Tanba ne'e, husu governu tenke kria mekanizmu, atubele autoriza loja sira, semana ida loke dala ida tuir oras limitadu ne’ebé governu tau.

"Karik bele ha’u propoin loke semana ida dala ida, loja hothotu oras mós ita limita, para ema bele halo manutensaun ba sira-nia uma ou sasán, se lae molok covid-19 oho ema, frustrasaun mak ema mate uluk tiha, ne'e ha’u husu governu para haree tetu tok”, dehan nia iha plenariu PN, segunda (29/3).

Rekomendasaun ne'e nia parte ko’alia ona iha plenária maibé governu seidauk ezkuta, tanba ne'e bele loja eletrónika no loja konstrusaun, nomós loja sira seluk, pelu menus semana ida loke dala ida, atubele fasilita komunidade sira.

Preokupasaun hirak ne’ebé mosu, nu’udar konsekuensia husi eletrisidade mate lakan, telkomnikasun falla, inklui udan boot, pior liután serka sanitária labele autoriza ema asesu ba loja atu sosa material hodi hadi’a uma.

Ba kestaun ne’e Sekretáriu Estadu Komunikasaun Sosial (SEKOMS), Mericio Juvinal Akara hatete, governu rejista ona preokupasaun husi deputadu sira, no sei informa ba governu atubele fó filafali resposta ba deputadu sira liuhusi karta eskrita.(*)