Hahalok umanu ne'ebé laiha konsensia hodi kuida ambiente ohin loron hamonu planeta ne'e ba ameasa. Mudansa Klimátika sai nu'udar ameasa boot tebes ba destinu planeta terra no kritatura tomak.

Maske Timor Leste iha kontribuisaun uitoan de'it ba alterasaun klimátika tanba produs de'it emisaun 0,003 part/million, maibé hanesan sidadaun mundial, Timor Leste tenke kontribui mós hodi salva planeta terra.

"Timor Leste laos nasaun emisór maibé hanesan sidadaun mundial, nune'e laiha planeta B, só planeta terra únika ba ema... ita tenke kontribui hodi salva planeta terra," deklara Sekretariu Estadu Ambiente, Demetrio do Amaral de Carvalho hafoin ensera Konferensia Nasionál Alterasaun Klimatika datoluk iha salaun auditóriu Ministériu Finansas, Sesta (07/06/2019).

SE Demetrio esplika, fatór ne'ebé fó impaktu boot ba meiu ambiente Timor Leste nian mak ema nia hahalok.

"Fatór barak, lere no sunu rai, hakiak aminimal sira husik arbiru, duut labele moris, ai labele moris, so'e lixu iha esgotu sira, estraga área bee-matan sira, halo uma iha fatin sira ne'ebé risku. Sira ne'e hotu kontribui hodi hasa'e ita-nia vulnerabilidade hasoru alterasaun klimátika", dehan Demetrio.

Demetrio dehan, atu asegura ambiente husi hahalok aat ema nian, governu mós iha lei balun, liu-liu iha kodigu penal artigu 215 to'o 221 kona-ba krime ambiental.

"Ita-nia kódiku penal deskreve krime ambiental ho pena sira ne'ebé tuir kódigu penal atribui. Iha krime balun ne'ebé kaman no krime balun ne'ebé todan. Ne'ebé iha mós sansaun no balun bele mós hetan kadeia," katak nia.