Print this page

PR Lú Olo Orgullu ho Esforsu no Profesionalizmu PNTL

Prezidente Repúblika (PR), Francisco Guterres ‘Lú Olo’ Prezidente Repúblika (PR), Francisco Guterres ‘Lú Olo’ Foto Arkivu

Temporimor (Díli) - Prezidente Repúblika (PR), Francisco Guterres ‘Lú Olo’ hatete, nia parte orgullu ho esforsu no profesionalizmu Polísia Nasionál Timor-Leste ne’ebé hatudu durante ne’e.

“PNTL, nu’udar forsa ida pertense mós ba Estadu hetan konfiansa no respeitu husi Timoroan sira no ha’u, nu’udar Prezidente Repúblika, sente orgullu tanba haree duni esforsu no profisionalizmu ne’ebé ita-boot sira hatudu liuhusi servisu importante tebes ne’ebé ita-boot sira hato’o ona no hato’o dadaun ba ita-nia Nasaun”, afirma PR Lú Olo iha ninia mensajen ba aniversáriu PNTL, sábadu (27/03).

Maibé, iha tempu susar ida-ne’e, presiza Polísia Nasionál ida ne'ebé iha motivasaun no preparadu, nakonu ho espíritu serví ho di'ak no banati tuir prátika sira ne’ebé di’akliu hotu husi polísia no seguransa.

“Ita presiza Polísia Nasionál ida ne’ebé marka prezensa iha liuron, hatene hakbesik-an ba Povu, hodi defende povu nia liberdade no nia direitu atu moris filafali ho esperansa”, dehan nia,

Xefe Estadu dehan, ba ida ne’e, kompete ba Estadu nu’udar riin ne’ebé garante defeza ba sidadaun sira-nia direitu no liberdade, atu rekoñese katak polísia presiza kondisaun ninian duni.

“Ita-nia Polísia Nasionál presiza infraestrutura ne’ebé di’ak, meius operasionais ne’ebé adekuadu, husi karreta to’o armamentu, husi ekipamentu hodi apoia atividade polísia nian to’o estrutura apoiu teknolójiku”, afirma. (*)

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items