Númeru kazu pozitivu dadaun ne’e aumenta kada loron iha mundu mak estadu deside Estadu Emerjénsia no governu aplika serka sanitária no konfinamentu domisiliáriu obrigatóriu ba Munisípiu sira ne’ebé infetadu inklui mós Kapitál nasaun.
“Pandemia Covid-19 ne’ebé Timor-Leste mós hasoru dadaun muda ona ita-nia moris iha sosiedade”, afirma PR Lú Olo, sábadu (27/03).
Haree ba situasaun moris sosiedade ne’ebé muda iha mundu tomak hahú husi tinan 2020 to’o agora, maske esforsu husi nasaun sira iha mundu hodi responde, maibé seidauk bele.
“Derrepente de’it ita-nia moris baibain muda, no ita bele haree momoos katak ita-na instituisaun no servisu balun , liuliu iha área saúde no seguransa interna seidauk bele hatán di’ak no lalais ba nesesidade ohinloron nian. Situasaun ida-ne’e halo ita preokupa liu kona-ba ita-nia futuru”, dehan Lú Olo.
Xefe Estadu hatete, bainhira fiskaliza kumprimentu medida prevensaun husi Governu, tenke haktuir prinsípius Estadu Direitu nian iha kontestu emerjénsia nian, ho maneira ida ne’ebé hanorin, informa no orienta povu, no uza de’it forsa bainhira presiza duni maibé tuir situasaun ida-idak ezije no natoon de’it hodi kontrola kedan.
Tanba, kna’ar ne’ebé profisionál sira seguransa públika nian hala’o iha liña oin, importante tebes katak iha mós kondisaun servisu di’ak hodi hamenus risku infesaun.
“Ida-ne'e ezije halo mudansa ba imi-nia rutina servisu, tenke uza hodi kbi’it ekipamentu protesaun pesoál, foti medida seguransa no prepara materiál ba orientasaun”, apela PR Lú Olo. (*)