Maske, partidu CNRT ne’ebé hahú hamosu infromasaun falsu Ihá momentu ne’ebé povo hasoru hela ameasa husi covid-19 hanesan mós ihá Nasaun seluk, maibé Governu ne’ebé forma husi plataforma no endtendimentu ne'e iha iha solidu atu hamrik to'o mandatu remata.
“Sé mak koko halo monu VIII Governu ne’ebé lidera husi General Taur Matan Ruak, FRETILIN nia responsabilidade nafatin atu salva nasaun no povu, la husik VIII Governu monu tuir CNRT nia hakarak, ho toman aat halo monu governu, forma governu, halo monu governu”, dehan Xefe bankada Fretilin, Francisco Miranda Branco, liuhusi komunikadu imprensa iha PN, kinta (25/3).
Reprezentante povu ne'e, rekoñese, katak programa barak mak governu ladauk bele implementa liuliu liga ho rekuperasaun ekonómika, maibé buat hirak ne'e tanba impaktu husi virus covid-19 ne’ebé mundu tomak no Timor-Leste mós hasoru.
“Líder sira presiza unifika ita-nia forsa no fó ita-nia kontribuísaun, hamutuk ho Governu hodi responde ba situasaun difísil ne’ebé ita-nia povu ho nasaun hasoru. La’ós tempu atu fahe forsa, atu fahe informasaun falsu, liuliu labele utiliza situasaun ida né atu halo polítika opozisaun destrutiva”, dehan Branco.
Maske mosu akuzasaun balun katak OGE 2021 aprova ona maibé Banku Federal Amérika sei la haruka osan mai Governu Timor-Leste. Maibé, Realidade OGE 2021 aprovadu no promulgadu husi Prezidente Repúblika no públika sai iha jornal Repúblika tuir prosedimentu normal.
Aleinde iha loron 23 fulan-fevereiru 2021, Banku Central de Timor-Leste (BCTL) mós haruka ona pedidu ba Banku Federal EUA no haruka ona osan dólar miliaun-atusrua (US$200.000.000 usd).
Nune'e VIII Governu ezekuta hela OGE 2021, hodi selu dadaun projetu sira inklui sesta bázika, selu hela saláriu no vensimentu ba funsionárius inklui saláriu ba deputadus CNRT na’in 21 ne’ebé abandona debate OGE 2021 no laiha justifikasaun.
Normalmente Bankada FRETILIN hakarak esklarese no lori hakmatek ba sidadaun hotu, katak Timor-Leste laihá krize finanseiru no laiha krize polítiku iha rai laran.
Bankada Fretilin mós deskonfia tanba la envolve iha Governasaun, mak CNRT komesa desmoralizadu, desesperadu hodi hanoin nafatin krize 2006, ho mehi atu krize akontese fali.
Tanba media center husi partidu CNRT hakerek artigu oioin, hatudu momós katak, CNRT seidauk ultrapassa “post power syndrome”, la simu realidade hodi sai opozisaun.
Nune'e, CNRT sei hakarak halo mosu problema golpe 2006 no sei mehi ho krize nafatin, bainhira povo no nasaun presiza mak hakmatek, paz, estabilidade, solidariedade no unidade, atu hamutuk kombate inimigu komum virus covid-19.
"Situasaun ida ne’e, hatudu momós katak CNRT ho nia lideransa lakon tiha ona sentidu Estadu, iha situasaun difísil ne’ebé mundu tomak afetadu (inklui Timor-Leste) ihá luta hasoru inimigu komum ida, ne’ebé ita la haree hetan (Covid-19), no fó ameasa boot ba ema nia vida no ba ekonomia Nasaun”, afirma nia.(*)
