Estrutura tuan nia mandatu remata iha 31 Maiu 2019, entaun tuir lei tenke iha fali estrutura foun ida, para nune’e bele kontinua prosesu tomak iha autoridade ida ne’e nia laran liu-liu oinsa mak ezekuta orsamentu ho baze legal.

"Ohin ne’e serimónia tomada de pose ba estrutura foun husi APORTIL ho mandatu durante tinan tolu", tenik Ministru Transporte Komunikasaun (MTK), José Agustino da Silva, iha servisu fatin, Segunda (3/6).

Nia dehan, durante ne’e administrasaun direta no indireta barak mak seidauk funsiona durante, entaun atu funsiona ne’e tenke iha lei para ativa ita nia kanal ba reseita ne’e.

Tanba lei seidauk iha, entaun bainhira halo kobransa ne’e ilegal. Tanba ne'e, tenke kria lei ba kanal reseita sira ne’ebé seidauk funsiona.

Entretantu, Eis Vise Ministru Transkporte no Telekomunikasaun iha V Governu Konstitusional, ne'ebe eleitu Prezidente APORTIL, Flávio Cardoso Neves hateten, estutura sesante ne’ebé hala’o servisu sira-nia mandatu remata ona, entaun Governu liuhusi Ministru Transporte Komunikasaun nomeia fali Konsellu Administrasaun foun.

Nia dehan, sei kontinua servisu hamutuk ho estrutura sesante sira tanba servisu ne’ebé esturutura tuan halo ona, kontinua apoiu nafatin atu servisu ne’e bele hotu tuir planu ne’ebé ministeriu iha.