Fidelis ko'alia ida ne'e relasiona deklarasaun Deputada Maria Angélica kona-ba rezultadu relatóriu primeira trimestre ne'ebé hatudu negativa liuhusi portal tranferénsia, inklui sistema free balance ne'ebé labele halo leitura ba Orsamentu Jerál Estadu  (OJE) ho diak.

"Iha portal transferénsia ne'e negativu, signifika katak orsamentu ne'e ita ezekuta ona maibé nia saldo laiha, agora sistema free balance ida ita hotu-hotu orgullu loos ne'e afinal de konta labele halo leitura ba OJE ne'ebé ita aprova", tenik nia, iha  Plenária Parlamentu Nasionál, Segunda (3/6).

Hataan ba ne'e, Ministru Fidelis husu ba deputadu sira tenke hatene 'lee'. Labele ko'alia de'it maibe la halo leitura ba relatoriu ne'ebé aprezenta ona ba deputadu sira.

"Relatóriu primeiru trimestre nian haruka tiha ona mai Prezidente Parlamentu Nasionál halo ona despaxu, tanba ne'e distinta deputada mak seidauk lee. Lee tiha lai ba mak krítika", dehan nia.

Nia hatutan, membru Governu sei diskute depois Ministra Finansas Interina mak aprezenta iha Parlamentu Nasionál.

Iha fatin hanesan, Prezidente Parlamentu Nasionál Arão Noé de Jesus Amaral hateten, relatóriu primeiru trimestre tama no despaxu ona, ne'ebé husu ba prezidente komisaun sira atu partilla ba deputadu sira iha forma eletrónika.