Asaun refere Líder Nasionál ne’e hatudu iha loron domingu (21/03) kuaze tuku 17 ho balun oras Timor-Leste, besik Tower, iha área Audian-Dili, maske Timor-Leste implementa hela regra Estadu Emerjénsia no aplika lockdown ba Kapitál Nasaun to’o loron 2 fulan-abril tinan 2021.
PNTL Dili hahú implementa ona regra serka sanitária no konfinamentu domisiliáriu jeral obrigatóriu. Maibé autoridade seguransa rasik la brani hase líder nasionál ne’e, maske loron hira liuba PNTL kaptura komunidade lubun boot ida bainhira hala’o jinastiku dadersan iha fatin públiku. Depos loron tuir fali autoridade seguransa iha kapitál RDTL mós halo agresaun fiziku hasoru komunidade balun iha área Tasitolu no Merkadu Taibessi, tanba la utiliza máskra no distánsia sosiál.
Iha situasaun ne’e, komunidade sira halibur no hobur líder bo’ot, Kay Rala Xanana Gusmao hodi hasai foto hamutuk no Prezidente CNRT ne’e trosa polísia hodi bolu polísia atu kaer sira (komunidade).
“Polísia mai ona….., Polísia kaer sira”. Maibe Líder Bo’ot ne’e kontinua hit liman fó sinal bolu komunidade “Hei.. polísia atu mai ona. Hoi imi hateke ba polísia ehhh”, Xanana hakilar.
La’ós Ida ne’e de’it, maibé ho lian ne’ebé maka’as liután líder nasionál ne’e bolu, “Polísia…..kaer sira. Polísia. Hoe polisia mai ona atu kaer imi”, Xanana hatudu liman ba PNTL ne’ebé liuhusi estrada.
Maske nune’e Líder Karismátiku ne’e dala ida tan, ho liman fó sinal bolu komunidade sira no hakilar, “Hoe, polísia atu mai ona, lalais”. Nune’e duni komunidade sira halai hadau malu atu foto hamutuk ho lider maka sira admira. maibé Eis Prezidente Republika ne’e la kumpri distansia sosial hodi hakuak komunidade feto, mane no labarik sira ne’ebé besik hodi hasai fotografia.
Iha mós komunidade ida ne’ebé hela iha área Audia hatete, atetude ne’ebé hatudu ladun di’ak, tanba fó risku ba ema barak iha tempu pandemia Covid-19.
“Hatudu ezemplu ladi'ak, ha'u adora Lider hanesan Maun Xanana, maibé hahalok ida ne'e ladi'ak lori risku ba ema hotu, Maun Xanana di'ak, moras kois ema mai foti no tratamentu espesial los, sira seluk hela ho naran”, hatete Sidadaun ne’ebé lakohi públika naran iha www.tempotimor.com, domingu (21/03).
Iha loron hanesan, kuaze oras ida antes, Sentru Integradu Jestaun Krize mos fó sai númeru kazu foun, pozitivu Covid-19 ho totál 55 iha Timor-Leste (TL) no kazu ativu sa’e ba 206.(*)
