Maibé deputadu bankada CNRT 21 ne’ebé sei ba hatan notifikasaun husi Ministeriu Publiku (MP) ne'e, sira bele ba direta no la presiza hetan imunidade husi Parlamentu Nasionál.
Tanba, prosedimentu normal ne’ebé Parlamentu Nasional hala'o, kuandu deputadu ida atu tuir investigasaun ka inkeritu iha MP, ida ne'e so fó autorizasaun maibé la'ós halo levantamentu imunidade.
"Levantamentu Imunidade ne'e presiza kuandu akuzasaun ne'e deduzida, hanesan akuzasaun ne'e tama tiha ona iha tribunal no marka ona atu hahu ona prosesu julgamentu, sei husu mai iha parlamentu atu halo levantamentu imunidade, e karta ida ne'e seidauk iha”, afirma nia iha Parlamentu Nasionál, sesta (19/03).
Maske bankada CNRT simu notifikasaun MP, maibé desizaun atu fó autorizasaun ne'e, Parlamentu Nasionál depende ba MP, tanba autorizasaun hasai wainhira Ministériu públiku fó karta ruma ba PN maibé kuandu la presiza ona signifika deputadu sira bele ba hatan diretamente iha MP.
Tuir informasaun ne'ebe PPN Aniceto asesu katak, deputadu bankada 21, dadauk balun hatan ona iha Ministériu Públiku.
"Ha’u rona dehan sira ba, hothotu ba hatan ona, los ga lae, ne'ebe laiha ona relavansia atu koalia autorizasaun”, hatete nia.
Maibé, Parlamentu Nasionál hanesan orgaun lejisladòr, sei hala'o servisu tuir lei, wainhira atu foti imunidade no halo suspensaun ba deputadu 21, bainhira tribunal husu PN.
Iha loron 15 fulan-marsu tinan 2021 Ministériu Públiku (MP) notifika ona deputadu na’in-rua-nulu-resin-ida husi CNRT nu’udar arguidu ligadu ho keixa husi Sekretáriu Jerál Partidu Frente Revolusionáriu Timor-Leste Independente (FRETILIN), Mari Alkatiri.(*)