Inspetór jerál Gabinete Inspesaun no Auditória (GIA), Henrique Oliveira Ximenes hatete,SEKoop, partikularmente iha GIA rasik, nia foin lídera ba fulan tolu hahú husi loron 24 fulan-novembru 2020 to'o agora.
Bazeia servisu ne’ebé haktuir iha lei orgánika husi estatutu SEKoop nian determina, atu hala'o servisu iha asuntu inspesaun, auditória ho investigasaun, ligadu ho servisua sira administrativa nian nomós koordenasaun.
Maibé tanba iha GIA rasik laiha prosesu dezenvolvimentu ba ninia estrutura oinsá atubele kompleta ninia rekursu umanu iha SEKOOP laran, nune’e rekomenda atu hala'o formasaun rekursu ba funsionáriu sira atu iha kuñesimentu rasik oinsá halo servisu auditória.
Tanba ne'e, durante formasaun ne'ebé parte Gabinete Inspesaun no Auditória (GIA) halo, iha ona funsionáriu hamutuk na’in-136 mak partisipa formasaun kona-ba halo auditória ka kontrolu interna iha SEKoop nian laran.
“Formasaun ne'e ami hala'o ba dala-rua ona. Primeiru iha fulan-dezembru iha Luz Clarita, kuaze 38 pessoas, 98 pesoas. Sé 38 mais 98 parese 100-resin kompostu husi kuadru sira ho mós funsionáriu sira atubele hatene”, hatete Oliveira ba jornalísta www.tempotimor.com iha nia Lanud Bairru-Pite, kuarta (17/03).
Ho formasaun sira ne'ebé hala'o ona, fahe ba parte rua, ida funsionáriu sira, ida seluk atribui ba kuadru superior sira hanesan, diretór jerál ho xefe gabinete sira atu habelar informasaun ba sira kona-ba papél gabinete inspesaun no auditória nian, ho investigasaun administrativa, ho objetivu atu hasa'e kuñesimentu nune'e bele hala'o kna'ar ho di'ak.
Hafoin formasaun hotu, ekipa GIA hala'o kedan servisu inspesaun la ho avizu preve, signifika sira halo avaliasaun urjente ba parte sira hanesan pontualidade, asiduidade husi funsionáriu sira.
"Dader tuir oras ka lae, meiudia tama tuku hira, lorokraik sai tuku hira, durante oras servisu, funsionáriu iha fatin ka lae, ida ne'e ami halo ona. Enjerál, kolega sira mós barak mak iha ona esperiénsia, sira mós kumpri duni oráriu sira ne'e. Tanba nu'udár funsionarius, públiku, administrasaun sira mós komprende e hala'o duni sira-nia kna'ar, durante tuku 7 liu sira iha ne'e hotu ona”,
dehan nia.
Maske balu dala-ruma tarde tanba transporte, no atraza mak dalaruma to'o minutu 10 de'it bele sei bele tolera, en-jerál nia observa katak funsionáriu sira atraza minutu balu de'it.
"Kuaze médiu ne'e maioria di'ak hotu ba leten, inklui maneira atu hatais, ida ne'e mós sira kumpri ona, tuir oinsá mak ita atu dignifika. Tanba ita hatene katak ita labele uza farda, uniforme, maibé ami mai servisu uza roupa ne'ebé formál”, esplika nia.
Tuir planu, formasaun ne'e sei kontinua nafatin ba funsionáriu sira foka uluk ba ekipa sira iha Gabinete Inspesaun no Auditória (GIA) nia laran hodi haforsa liután kuñesimentu iha servisu auditória nian.(*)
