Deputada Olinda, agora ne'e Dili enfrenta hela serka sanitária, tanba ne’e deputadu labele obriga MSSI atu apoiu karreta funeral ba tula mate isin husi Dili ba Munisípiu.
Olinda mós akuza deputada Elvina ko’alia hanesan ai-moruk mak lanu nia tanba ladun akompaña didi’ak servisu governu nian iha aimbitu prevensaun ba transmisaun lokál covid-19.
"Governu tur la metin, agora ita-boot hakarak fó tan desizaun Ministériu solidaridade sosiál atu nune'e bele despaisu karreta ba tula mate. Mate iha ne'ebe hakoi iha ne'e de'it, to'o lockdown hotu tiha mak mai foti mós di’ak hela. Tanba saida mak obriga Ministériu Solidaridade Sosiál, keta halo ba hemu sala ai-moruk karik, hemu tiha nú been ruma para mós tiha, labele ataka fali Ministériu Solidaridade Sosiál”, dehan nia iha plenária Parlamentu Nasionál, tersa (16/03).
Maibé, Deputada bankada Partidu Demokrátiku (PD) Elvina Souza husu ba deputada Olinda atu buka hatene papel deputadu nian, nune'e sai reprezentante povu atu hato'o susar no problema ne’ebé povu hasoru, tanba Ministériu la'ós partidu KHUNTO nian.
Ne'e duni nia husu KHUNTO hakarak proteze ministra ka vise primeira ministra, di’ak liu asegura iha uma no labele asume kargu públiku.
"Iha problema barak ne’ebé ita hasoru, ha’u la halo insultu ba señora ministra, ko’alia kona-ba responsabilidade Ministériu, tanba Ministériu ne'e la'ós ministra nian, la'ós kusta ema ida nian, la'ós ita-boot nian, nomós la'ós KHUNTO nian”, afirma nia.(*)