Lu Olo Telefone Jokowi, Kongratula ba Konfiansa Povu Indonezia iha Eleisaun Featured

Timor Leste nia Prezidente Republika, DR. Francisco Guterres Lu Olo, liu husi telefone kongratula vitoria ne'ebe Prezidente Republika Indonezia, Joko Widodo, Kinta Feira (30/05) Timor Leste nia Prezidente Republika, DR. Francisco Guterres Lu Olo, liu husi telefone kongratula vitoria ne'ebe Prezidente Republika Indonezia, Joko Widodo, Kinta Feira (30/05) Foto Media Prezidente da Republika

Tempotimor (Dili) - Prezidente Repúblika Francisco Guterres Lu Olo, hodi povu Timor Leste tomak ninia naran,  telefone ba Prezidente Repúblika Indonezia Joko Widodo ne’ebé hetan re-eleitu fila ba segundu mandatu iha eleisaun prezidensial Indonezia nian ne’ebé hala’o iha 17 Abril 2019.

“Prezidente Repúblika Francisco Guterres Lú Olo, ohin, kongratula Joko Widodo  ne’ebé re-eleitu nu’udar Prezidente Repúblika Indonézia nian ba periodu 2019-2024 liu husi xamada telefónika,” informa gabinete Prezidensial liu husi komunikadu ne’ebé tempotimor asesu, Kinta kalan.

Iha ninia konversasaun ho Jokowi, Lu Olo fó parabéns no fó votus susesu ba Jokowi nia mandatu tuir mai.

“Ha’u hakarak fó parabéns ba releisaun Prezidente Repúblika Indonézia. Povu indonézia hili nia xefe estadu ida. Povu Indonézia hili ninian bem estar no dezenvolvimentu liu husi ita-nia figura. Ha’u hato’o votus susesu ba mandatu ba oin. Ha’u reafirma fila fali Timor-Leste nia kompromisu  atu hametin di’ak liu tán relasaun rai rua no povu ba futuru,” dehan Lu Olo ba Jokowi.

Entretantu, Prezidente Jokowi agradese ba kongratulasaun husi Xefe Estadu Timor Leste.

Jokowi hatete katak durante mandatu ba oin sei halo kooperasaun Indonézia no Timor Leste sai forte no util.

Iha oportunidade ne’e, PR Lu Olo mós konvida Jokowi atu partisipa iha komemorasaun tinan 20 referendu iha Timor Leste.

“Prezidente Jokowi agradese konvite husi Prezidente Repúblika Francisco Guterres Lú Olo ba loron istóriku ne’e,” dehan gabinete prezidensial.

Aleinde PR Lu Olo, espoza PR Lu Olo, Cidalia Lopes Nobre Mouzinho Guterres, mós hato’o felisitasaun ba  Prezidente Jokowi no espoza Iriana no povu Indonézia ne’ebé sei selebra Idul Fitri.

Hanesan públiku hatene, bazeia ba rezultadu ne’ebé Komisaun Eleisaun Jeral (Komisi Pemilihan Umum-KPU) Indonezia nian fó sai kandidatu Prezidente Repúblika no Vise Prezidente númeru sorteiu 01, Joko Widodo-Ma’ruf Amin konsege hetan vitoria ho votus 55%, hodi halakon kandidatu númeru sorteiu 02, Prabowo Subianto-Sandiago Salahuddin Uno ne’ebé hetan de’it 45%.

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.

Contact us

Palapasu
Dili, Timor-Leste
+670 7723 4852
+670 7728 1698
http://www.tempotimor.com